Scudamore a hausak belh dawn
Premier League club te chuan executive chairman chhuak mai tur Richard Scudamore thlah nana £250,000 ṭheuh thawh khawm tura ngen an nihna chu an pawm a, a tlingkhawm hi a vaiin pound maktaduai nga a ni ang.
Scudamore hian December-ah chuan kum 19 zet a thawh tawhna Premier League hi a chhuahsan tawh dawn a, January 2019 aṭang chuan Susanna Dinnage chu Premier League hotu ber a ni tawh dawn a ni.
Kum 1999-a Scudamore-a'n Premier League a zawm tirh khan UK bika an television rights hlut zawng chu pound maktaduai 670 a ni a, tun hnaia an contract ziah tharah erawh pound tluklehdingawn 5.14 a tling a ni.
Premier League-a advisor dinhmun luah chhunzawm tur Scudamore hi, "A hnathawh ṭha tak avanga sum hi pek tur a ni," tiin thuchhuah siam a ni a, hetihlai hian fans lam chuan he thil hi an pawm lo hle.
Football Supporters' Federation (FSF) chuan kum khata pound maktaduai 2.5 hlawhtu tana Premier League club te sum thawh chu ṭul lo tiin, "Club te hian budget fel tak an neih sa thu uar takin sawi ṭhin mah se an duhnaah chuan sum hman tur an nei a, tv schedule avanga fixture inthlak kara fan-ten kan pawisa kan chan fo laiin an duhnaah chuan sum thehchhuah an thei em em si," tiin an lungawi lo hle.