Indian Super League: A hun a thleng dawn ta Mizoram player 30-in inelna an hmachhawn dawn

India rama football inelna ngaihhlut hlawh ber leh sang ber Indian Super League chu zanin dar 7:30-ah khelh ṭan a ni dawn ta a, Kerala Blasters leh ATK Mohun Bagan ten match hmasa ber an khel dawn. 

ISL-ah hian team 11 an inel dawn a, Mizoram aṭangin footballer 30 ngawtin inelna hi an hmachhawn dawn. Season hmasa ISL-ah khan Mizoram aṭangin player 22-in ISL an khel a, player pariat ngawtin tun season ISL-ah Mizoram player an pung tihna a ni.

Manipur chu state mala ISL-a player thawh hnem ber an ni a, player 43 ngawt an thawh. Manipur hnuai chiahah Mizoram an awm a, West Bengal (29), Goa (26) leh Punjab (25)-ten an dawt. 

ISL club zingah Odisha FC chu Mizoram player kawl hnem ber an ni a, anni hian Mizo player paruk ngawt an kawl. Odisha hian Aizawl FC aṭangin midfielder Isak Vanlalruatfela leh Paul Ramfangzauva an lalut a, player pahnih tan ISL-a an season hmasa ber tur a ni. 

Odisha Mizo player zingah Daniel-a chu club tana khel hmasa ber a ni a, 2018-19 season khan Delhi Dynamos hming chawia an khelh laiin he club hi a zawm tawh - season hmasa khan match 16-ah a inlan. 

Jerry Mawihmingthanga-a'n season hmasa ṭan dawn khan Jamshedpur FC aṭangin Odisha FC hi a zawm a, Chanmari tlangval hian season hmasa khan ISL-ah match 17 khelin goal thum a khung a, assist vawi nga a nei. 

Season hmasa khan Odisha FC-in an youth team aṭangin Lalhrezuala Sailung chu senior squad-ah an dah a, mahse a inlan lo thung. Khawvel huap pawha academy lar Aspire Academy, Doha-a a inzir leh hnuin Odisha senior squad-ah bawk telh nawn a ni a, Lunglei rawlthar hian tun season-ah ISL-a a match hmasa ber khelh a beisei ang. 

Indian football ngainatu zingah Samuel Lalmuanpuia a mikhual lo. Zemabawk North tlangval hian Kerala Blasters aṭangin Odisha hi tun season atan a zawm a, Shillong Lajong-ah captain a lo ni tawh ṭhin bawk. 

ATK Mohun Bagan: Mizo awm lo

Bengaluru: Lalthuammawia Ralte (Goalkeeper), Joe Zoherliana (defender), Emanuel Lalchhanchhuaha (midfielder), Edmund Lalrindika (striker)

Chennaiyin: Jerry Lalrinzuala (defender), Lalchhuanmawia Fanai (defender), Lallianzuala Chhangte (midfielder)

FC Goa: Mizo awm lo

Hyderabad FC: Lalbiakhlua Jongte (Goalkeeper), Laldanmawia Ralte (midfielder), Mark Zothanpuia (midfielder), Lalawmpuia (forward)

Jamshedpur FC: Laldinliana Renthlei (defender), Ricky Lallawmawma (defender), Isaac Vanmalsawma (midfielder), William Lalnunfela (forward)

Kerala Blasters FC: Lalruatthara (defender), Lalṭhathanga Khawlhring (midfielder)

Mumbai City FC: Hmingthanmawia (defender)

NorthEast United FC: Lalengmawia (midfielder), Lalrempuia Fanai (midfielder), Rochharzela (midfielder), Alfred Lalrautsanga (midfielder),  Lalkhawpuimawia (forward)

Odisha FC: Isak Vanlalruatfela (midfielder), Jerry Mawihmingthanga (midfielder), S. Lalhrezuala (midfielder), Paul Ramfangzauva (midfielder), Samuel Lalmuanpuia (midfielder), Daniel Lalhlimpuia (striker)

SC East Bengal: Lalramchullova (defender), Jeje Lalpekhlua (striker). 

Lengpui tlangval Joe Zoherliana'n Aizawl FC tana season duhawm tak a hman rah sengin club tam tak chil a ti put a, club hlun leh kalphung ṭha Bengaluru FC zawm a thlang - ISL-a a season hmasa ber tur a ni. 

Bengaluru hian I League-a an ropui vanglaia an goalkeeper Lalthuammawia Ralte chu East Bengal aṭangin an la let a, Kolkata club-a loan-a hun hmang striker Edmund Lalrindika chu Bengaluru-ah a kir leh tawh bawk. 

Season hmasa lama youth team tana khel, midfielder Emanuel Lalchhanchhuaha chu senior team-ah sawn chhoh a ni a, regular nghal tura beisei a harsa ang. 

nhriat nei ṭha Lalchhuanmawia Fanai chuan Chennaiyin a zawm a, season hmasa khan Odisha tan a khel. Mumbai City leh Pune City tan ISL-ah a lo khel tawh a, Shillong Lajong leh Bengaluru tan I League-ah a lo inlan tawh ṭhin bawk. 

Jerry Lalrinzuala'n Chennaiyin tan a khelh chhunzawm dawn a, kum 2016-a ISL Emerging Player of the League lo ni tawh hi left back-a khel ṭhin a nih avangin Chhuantea nen khelh an inchuh ang. 

Lallianzuala Chhangte-in en bik a hlawh leh dawn tih a chiang a, season hmasa ISL-ah khan match 21 khelin goal sarih a khung - Indian player zingah goal khung tam lama a phak loh awmchhun chu Sunil Chhetri (9 goals) chiah a ni. 

Mumbai City-ah Mizoram player awmchhun chu Hmingthanmawia (Valpuia) a ni a, Aizawl FC defender hlui hian season hmasa khan Mumbai club zawmin match li a khel. 

FC Goa coach hlui Sergio Lobera enkawlna hnuaiah Valpuia'n hmun pawimawh chan theih a inbeisei ang. 

Tun season ISL chhehvela boruak nei lian ber chu East Bengal tih ngam a ni a, Kolkata club-ah hian 'The Mizo Sniper' Jeje Lalpekhlua leh Lalramchullova te an awm. 

Hnahthial tlangval Jeje hian ISL-ah match 69 khel tawh goal 23-a khung a, assist vawi sarih a nei. ISL-a goal khung hnem lamah parukna a ni phak a, Sunil Chhetri (39 goals) chu Indian player zinga a phak loh awmchhun a ni. 

Jeje hian Chennaiyin tan ISL-ah season ruk a khel hman a, season hmasa erawh hliam vangin a inlan lo tluan thung - tun season-ah Kolkata club tana khelin a ropuina neih let leh a tum ang. 

Mizo defender ṭha Lalramchullova chuan Mohun Bagan aṭangin East Bengal a zawm bawk a, Armed Veng tlangval Chullova tan tun season hi ISL-a a season hmasa ber tur a ni. 

NorthEast United-in Mizoram player pali an kawl a, Churchill Brothers aṭangin Kelkang tlangval Lalkhawpuimawia (Mapuia) chuan Highlander hi a zawm - ISL-a a seaosn hmasa berah hming chher a tum ang.

Rochharzela chuan Aizawl FC aṭangin NorthEast United hi a zawm bawk a, midfielder Lalengmawia leh Lalkhawpuimawia te chu Highlander team-ah hian an awm bawk.  

Lalengmawia hian season hmasa khan Indian Arrows aṭangin NorthEast United hi a zawm a, player pawimawh a ni phak - match 10 a khel. 

Rempuia hian 2016 aṭang khan Highlander-ah hian a lo khel tawh a, Pune City, Pune FC leh Minerva Punjab tan a lo khel tawh. 

Mizoin tun season ISL-ah goalkeeper pahnih kan nei dawn a, Thuama bakah Lalbiakhlua Jongte chuan ISL club tan si ban a nghak dawn - season hmasaa Indian Arrows tana I League khel keeper hian Hyderabad FC a zawm. 

India tana age level hrang hranga inlan tawh keeper bakah hian R. Laldanmawia, Mark Zothanpuia leh Lalawmpuia te chuan Hyderabad club tan hian an khel dawn. 

'Sialhawk Express' tia hming lem an pek Danmawia hian season hmasa khan HFC tan a khel tawh a, ISL-a a season hmasa berah match nga khelin goal khung a nei lo.

Season hmasaa HFC reserve team tana a khelh hnuah midfielder Mark Zothanpuia chu senior squad-ah telh a ni a, FC Goa aṭangin forward Lalawmpuia chuan Hyderabad a zawm bawk.

Zanin ISL-a inlan tur Kerala Blasters-ah defender Lalruatthara leh midfielder K. Lalṭhathanga (Puitea) te an awm a, Hmunhmelṭha tlangval Ruatthara'n Blasters tan season li a khelhna tur a ni. 

Aizawl FC tana I League nomawi chawi tawh Ruatthara hi 2017-18 season khan ISL Emerging Player of the Season-ah thlan a ni a, season hmasa khan pre-season-ah a inhliam avangin season chawhnu lam match thum bak a khel hman lo. 

Ruatthara chuan, "Tun dinhmunah chuan hliam leh thil dang minti buaitu a awm rih lo a, season duhawm tak hman beiseiin ka thlir mek a ni," tiin Vanglaini a hrilh. 

Puite-a'n season hnih chhung chu ISL a khel tawh a, NorthEast United tan bak a la khel ngai lo. Blasters-ah chona thar hmachhawn turin a kal a, hlawhtlinna chhar a inbeisei ang. 

Mizoram Premier League chhul chhuak Laldinliana Renthlei leh Ricky Lallawmawma te chuan Jamshedpur FC tan an khel dawn a, Mizo football-a mikhual lo tak William Lalnunfela'n JFC hi a zawm ve bawk. 

Chhinga Veng aṭanga hming chher Laldinliana hian Chennaiyin tan ISL-ah season hnih a khel tawh a, tun season-ah kum thum chhung atan JFC-ah contract-a ziak. Aizawl FC, Chanmari FC leh Zo United tana khel tawh Ricky-a'n kum hnih atan contract a ziak a, ATK tan ISL-ah season hnih a khel tawh. 

William Lalnunfela'n Aizawl FC aṭangin JFC hi kum thum chhung atan a zawm a, ISL-a khelh hmasak ber tur a ni. Isaac Vanmalsawma chu JFC-ah season hmasa aṭang khan a khel tawh a, season hmasa khan match kua khelin goal khat a khung. 

•    Club 11-in inelna an hmachhawn dawn

•    ATK chu Mohun Bagan nen an inzawm tak avangin ATK Mohun Bagan tih an ni ang. 

•    East Bengal-in I League chhuahsanin a vawi khat nan ISL an khel dawn. 

•    ATK Mohun Bagan, Chennaiyin FC, Bengaluru FC, Kerala Blasters FC, NorthEast United FC, Odisha FC, FC Goa, Jamshedpur FC, Mumbai City FC, Hyderabad FC leh SC East Bengal-te chu team inel tur an ni. 

•    Substitution panga siam theih a ni ang a, vawi thuma siam zawh tur a ni thung. 

•    ISL club 11 hi an inkhel kual ang a, a tawpah a sang paliin playoff/semfinal double-leg an khel ang a, final hmangin ISL champion tur zawn a ni leh ang. 

•    ISL club tinin ram pawn player panga aia tlem lo an neih ngei ngei a ngai a, pasarih aia tam neih a thiang lo thung - an zinga pakhat chu Asian player a nih a ngai bawk. 

•    East Bengal, FC Goa leh Hyderabad-ten ram pawn player paruk ṭheuh an nei a, anni tih loh ISL club dang zawngin 'foreign quota' hnawh khatin ram pawn player pasarih ṭheuh an nei thung. 

•    Indian player paruk talin inkhel bul an ṭan ngei ngei tur a ni a, foreign player panga aia tamin vawi khatah khelmual an luah a thiang lo. 

•    Covid-19 vangin Goa-in inelna an thleng a, player-te hi kar khatah vawi hnih test an nei ṭhin. 

•    Jawaharlal Nehru Stadium (Fatorda), Tilak Maidan Stadium 

(Vasco) leh GMC Athletic Stadium (Bambolim)-ah te inkhelh ṭhin a ni ang.