Chhetri tel lohna India zaninah inlan dawn

India chuan zanin dar 9:30 hian Jordan nen international friendly match an khel dawn a, inkhel hi Star Sports-in live-a en theih turin a chhawp chhuak ang a, online-a en duh tan Hotstar leh Jio TV lamah en theih a ni bawk ang.

Blue Tigers tia hminglem an pek India hian hliam vangin captain Sunil Chhetri an hruai thei lo a, kum 34 mi striker tel loa India inlan tur hian ngaihven a hlawh hle - Mizo tlangval Jeje Lalpekhlua tan mawhphurhna a sang sawt dawn tihna a ni.

India hian an friendly match hnuhnung berah China chu goal khung loa an inhnehtawkpui theih avangin an inringtawk sawt ang tih a chiang a, mahse Jordan hi Asia khawmualpuia team ṭha pawl an nih reng avangin chak tura rinkai zawk erawh an la ni tho.

Mizo Sniper

Hnahthial tlangval Jeje-a'n tun season-ah goal khung a harsat a, January-ah India-in Asian Cup a khelh tawh dawn bawk si avangin Mizo tlangval 'form' lo hian Indian football ngainatute a ti mangang hle.

Chennaiyin FC striker hian Indian Super League lamah beisei a phak lo a, league match sarih a khelh tawh aṭangin goal khung a la nei lo. Hriat tel atana ṭha erawh Jeje hian bench lamah a hun tam zawk a hmang a, a minute khelh zat belhkhawm hi minute 301 chauh a ni.

'The Mizo Sniper' tia hming­lem an pek hian tun hnaiah beisei phak lo mah se a zam phah lo. Jeje chuan, "Jordan hneh ngei tumin theihtawp kan chhuah dawn a, chhuanlam siam a thiang lo ang," a ti a, India hi hnehna chanpui ngei a tum - Indian football fan-ten a goal khung hmuh an chak ang.

Team ṭha

Jordan laka hnehna chan hi India tan a awlsam dawn lo tih chu thil chiangsa a ni a, Belgium international hlui Vital Borkelmans enkawlna hnuaia khel team hian an friendly match hnuhnung berah 1-2 chauhin Croatia an ngam lo.

Kum 55 mi coach Borkel­mans hi Belgium national team-ah 2012-2016 chhung kha assistant coach niin Marc Wilmots nen khan an thawkdun ṭhin a, coach tawnhriat nei ṭha tak a nih avang­in coach aṭang ringawt pawh­in India aiin an ṭha zawk sa.

India coach Stephen Con­stantine chuan, "Nakkuma Asian Cup kan khelh hunah ṭha taka khelh kan duh a, chumi atana inbuatsaih nan chuan Jordan tum hi a pawimawh a, player ṭha tak tak an kawl a ni," tiin Jordan ṭhat zawk thu a pha lo.

Inlan tur

India tan match 51-a goal 22 khung thei Jeje chu inkhel bul ṭan ngei tura beisei a ni a, tlarhma lamah Balwant Singh chu Hnahthial tlangval thlawp tur hian a awm bawk ang.

Chennaiyin-a Jeje nena kheldun Jerry Lalrinzuala chu squad-ah hian tel mah se inkhel bul a ṭan erawh a beiseiawm chiah lo a, tlarhnungah hian Con­stantine hman thiam sa Pritam Kotal, Subhasish Bose, Sandesh Jhingan leh Narayan Das te chu dah leh an nih a rinawm.

Midfield laiah China laka inkawp fuh em em mai Anirudh Thapa leh Pronay Halder chu inkawp tura beisei an ni a, mual sir aṭanga thlawp turin Udanta Singh leh Halicharan Narzary an awm ang - Gurpreet Singh chu harsatna a nei thut a nih loh chuan India tana si ban nghak tur a ni.

En bik tur

Croatia laka goal a khung ṭumin Jordan forward Baha' Faisal chu bench aṭanga luhtir a ni a, a khelh danin a zir ṭhin miau avangin India lakah bul ṭantir a nih pawhin a mak lo ang - kum 23 mi chauh a la ni.

Kum 21 mi winger Musa Al-Taamari hi Jordan player bei­seiawm ber pawla an sawi a ni mek a, Cypriot club ṭha, Cham­pions League-ah pawh kan hmelhriat tawh fo APOEL FC tana khel niin Indian tlarhnung chhaih buai turin a thiam tawk.

Goalkeeper leh captain ni bawk Amer Shafi hi kum 36 mi niin tawnhriat a ngah tawh viau a, ram tan match 134 ngawt a khel tawh - Jeje leh a ṭhiante tan hna a hautak sawt dawn tihna a ni.

Kalkawng hau tak

India hi khaw chhia avangin zin kawngah harsatna an tawk a, ruahsur nasat vanga thlawhtheihna ṭum hmuna tui tling a tam avangin flight cancel a tam a, zin kawngah hun an hman rei phah hle.

India team hi hmun hniha in-

ṭhenin Kuwait-ah inhmu khawm tur ni mah se a rem­chang ta lo a, inkhelhna tur hmun Jordan-ah an intawk khawm ang. Jeje chuan, "Kan fitness-ah nghawng a nei ang, tih a hlauhawm ber a. Zin kawnga harsatna kan neih hian kan rilru nghawng lo se a ṭha ber," tiin Vanglaini a hrilh.

Goalkeepers: Gurpreet Singh Sandhu (Bengaluru FC), Amrinder Singh (Mumbai City FC)
Defenders: Pritam Kotal (Delhi Dynamos FC), Nishu Kumar (Bengaluru FC), Sandesh Jhingan (Kerala Blasters FC), Anas Edathodika (Kerala Blasters FC), Salam Ranjan Singh (East Bengal), Subhasish Bose (Mumbai City FC), Narayan Das (Delhi Dynamos FC), Jerry Lalrinzuala (Chennaiyin FC)
Midfielders: Udanta Singh (Bengaluru FC), Jackichand Singh (FC Goa), Pronay Halder (ATK), Anirudh Thapa (Chennaiyin FC), Vinit Rai (Delhi Dynamos FC), Halicharan Narzary (Kerala Blasters FC), Ashique Kuruniyan (FC Pune City), Germanpreet Singh (Chennaiyin FC)
Forwards: Jeje Lalpekhlua (Chennaiyin FC), Sumeet Passi (Jamshedpur FC), Balwant Singh (ATK), Manvir Singh (FC Goa)