Aizawl FC Academy an thiam ber

NECS ADFA I Division League chu Ningani zan khan Lammualah a hmawr bawkna neih a ni a, nomawi inchuhna inkhelah Aizawl FC Academy chuan Kanan FC 3-1 a hnehin an champion.

ADFA League season hnuhnung pathumah AFC Academy hian final an lut vek a, mahse a chak lo zawkah an ṭang vek thung. Tunah erawh thawnthu a danglam ta, ADFA I Division 2014 champion hian league hmanga inelna neih a nih hnua a vawi khat nan nomawi an chawi.

Aizawl FC Academy lamin inkhel thunun chungin H. Lalnunzira (13') leh PC Lalhriatpuia (17') te hmangin an khung nghal, minute li kar dan leka goal chhuah Kanan FC lam an hawihai hle.

Chawlhlawk hma deuhin AFC lamin an goal thumna khung theihna hun ṭha an nei, mahse David Lalhlansanga penalty pet chu keeper Lalruatmawia'n a dan sak; first half chhungin goal hnih lut mah se champion tur zawk a la chiang lo.

Second half-ah Kanan lam an beidawng duh lo, bench aṭanga lut Lalmalsawma ball vawrh luh chu box chhunga awm Lalhmingchhuanga chuan mawi zetin a pet lut a, minute 73-ah 2-1 niin an beiseina a nung thar hle.

Mahse, Kanan lamin league round lama an inhnehtawk pui lakah goal an khung chhunzawm thei lo. Hun tawp hma chiahin Lalfelfamkima goal shot per chu Augustine Lalrochhana chuan Aizawl FC Academy chak nemngheh nan a khung.

First division-ah Aizawl FC Academy champion mah se an senior team-in MPL an khelh avangin Mizoram league sang ber an khel ve thei lo. Hei vang hian Aizawl DFA aiawhin pahnihna Kanan FC leh pathumna FC Venghnuai ten MPL Playoff an khel ang.

Lawmman
Champion Aizawl FC Academy Rs 150,000/-
Pahnihna Kanan FC Rs 80,000/-
Pathumna FC Venghnuai Rs 60,000/-
Fairplay Kanan FC Rs 10,000/-
Mimal Lawmman
Best Player PC Lalhriatpuia, AFC Academy
Top Scorer PC Lalhriatpuia (12 Goals), AFC Academy
Best Forward David Lalhlansanga, AFC Academy
Best Midfielder Vannunmawia, AFC Academy
Best Defender Lalchungnunga, AFC Academy
Best Goalkeeper Lalhriatpuia, AFC Academy