Mangṭha Rooney - I liam mai ang maw!

Wayne Rooney-a'n England jersey a ha leh tawh ngai dawn lo. Ningani zan khan England chuan 3-0 in USA an sawp a, Rooney-a'n England tana jersey a hak hnuhnung ber a ni nghal bawk.

Manchester United legend hian World Cup 2018 khelh a nih hma daih tawhin England tana inkhelh a chawlhsan thu a lo puang tawh a, Gareth Southgate-a'n ram tana inkhel tura a kohna chu a hnawl.

Mahse, English striker hi pangngai taka thlahna neih a la ni lo a, Ningani zan inkhel hi 'Wayne Rooney Foundation International' tih niin Rooney thlah nan hman a ni.

Kum 33 mi striker hian a phu ang thlahna a hmu a, Jesse Lingard, Trent Alexander-Arnold leh Callum Wilson ten goal khat

ṭheuh khungin an 'captain' hi an thlah.

A tawp nan Rooney

Hun tawp nan minute 33 chauh a awm tawh tihah Rooney luhtir a ni a, Wembley Stadium-a fans pungkhawm ten zahna lantirin ding chung leh kut beng chungin an lo lawm.

Ram tana match 120-a khelhnaah Rooney-a'n goal khung lo mah se striker ṭha tak a la ni reng tih erawh a lang a, inkhelh hma hian lawmpuina pek a nih bakah guard of honour pek a ni bawk.

Wembley Stadium-a inkhelh a nih hma hian Rooney hian a jersey number hak ṭhin 10 a hak loh tur thu leh captain a nih loh tur thu sawi ni mah se inkhel hun a thlen meuh chuan English striker hian number 10 a ha a, captain armband a hreng bawk.

Ball a khawih apiangin Rooney lawmna au thawm a ring a, DC United forward hian mipuiin an beisei ber goal erawh a khung thei lo - a hun neih ṭha tak chu Brad Guzan chuan ṭha takin a dan sak.

A hmun ruak

Rooney hmun ruak luah a harsa dawn tih a chiang reng - ram tan match 120-ah goal 53 a khung thei a, Three Lions tan ani anga goal khung hnem an la awm lo.

English striker hi inkhel ṭan hmain Harry Kane chuan trophy a hlan a, Rooney chuan, "Harry hian ka record a la khum theih ka rin avangin trophy kha min hlan turin ka ti a ni," a ti.

Kum 25 mi striker hian ram tan match 34-ah goal 19 a khung a, Rooney a la phak lohna hi goal 34 a ni. Hriat tel atana ṭha erawh kum 25 chauh a la nih avangin Kane hian Rooney khum turin hun a la ngah tawk.

Rooney chuan, "Fan-te hmaah ka inkhel leh thei hi ka lawm a, kei leh ka chhungte tan he hun hi a danglam bikin a hlimawm em em a ni," tiin a sawi.

Hmabak eng

England fan-ten an legend thlah mah se lawmna tur an nei a, chu chu England hmabak a eng tih hi a ni. England starting XI-a player-te ram tana an inkhelh tawh zat belhkhawm chu 94 chiah a ni!

May 1980 hnua England starting XI ten tawnhriat an neih tlem ber ṭum a ni a, mahse an khel ṭha em em si. Jesse Lingard chuan minute 25-na lekah mawi zetin goal hmahruai a khung a, minute hnih hnuah Arnold chuan England tana a goal hmasa ber a khung bawk.

Hun tawp nan minute 13 chauh a awm tawh tihin Callum Wilson chuan England tana a match hmasa berah goal a khung ve nghal bawk a, Three Lions fan-te tan chuan lawmna tur hlir a ni.

Southgate chuan, "Player naupang tak tak kan neihte enchhin nan he hun hi hman kan duh a, a ṭha thei ang bera rawn khel chhuakin kan player neih tawh zinga ropui ber pawl hnenah ṭha takin an zahna an rawn lantir a ni," tiin a lawm hle.