Chelsea khan ka player duh min leisak lo - Conte

Antonio Conte chuan Chelsea a enkawl chhunga a lungawi lohna a sawi chhuak a, beisei anga a hlawhtlin tak lohna chhan chu a player duh pahnih Romelu Lukaku leh Virgil van Dijk te an leisak theih loh vang niin a sawi.

Italian manager hian 2017 khan Blues chu Premier League nomawi a chawipui a, a season lehah FA Cup an la bawk. Mahse season hnih hnu lekah London club hi chhuahsanin, tunah chuan Inter Milan a enkawl ta zawk.

Chelsea a enkawl lai sawi chhuakin Conte chuan, "Player pahnih lei duh em em ka nei a, pakhat chu Lukaku a ni a, pakhat zawk chu Virgil van Dijk a ni thung. Player pahnih kha lakluh tumin kan bei ngei a, kan lalut teuh hle bawk. Nei thei ni ila chuan nasa takin hma kan sawn phah ngei ang," a ti.

Inter Milan a zawm hnuah Conte hian Manchester United aṭangin Lukaku chu a lei chhuak ta ngei a, Belgium international striker hi a hmang thiam viau - season hmasa khan Serie A-ah pahnihna nihpuiin, champion Juventus an phak lohna chu point khat chauh a ni.

Dutch defender Van Dijk erawh Liverpool tan ban rinawm a ni a, khawih chet rual loh a ni. Conte naute hian Pathianni zan dar 7:30-ah Torino an hmachhawn dawn, kar lehah Champions League khel turin Real Madrid an mikhual zui leh nghal ang.