Top 4 inchuhna: Man United Vs Spurs

Premier League top four inchuh boruak a hot. A mei zang hlaptu zinga tel pha Manchester United leh Tottenham Hotspur te zanin dar 11:00 hian Old Trafford-ah an inkhel dawn - a hmuhnawm loh ring suh.

Ralf Rangnick-a kaihhruai Man United hi Etihad Stadium-a mualpho hlim an ni a, an hmelma Manchester City lakah 4-1 ngawtin an tlawm. Tottenham boruak hap a dang thung. Antonio Conte hote hian Thawhṭanni zan khan Everton 5-0 ngawtin an sawp.

3-0 kha
October 30 khan Man United-in Spurs an tlawh a, 3-0 in an sawp. Cristiano Ronaldo, Edinson Cavani leh Marcus Rashford ten goal an khung. Ole Gunnar Solskjaer hnuaiah Man United-in beiseina thar an neih phah.

Tottenham Hotspur erawhin an manager Nuno Espirito Santo an ban phah a, Man United nen pawha sawizawm Antonio Conte an lalut. Spurs tan an hmelma laka point thum hloh hi a pawi a, chutihrualin Italian manager tawnhriat nei ṭha an chan phah avangin lawmna tur a awm tho.

Man United-in Norwegian manager Solskjaer an ban ta tho a, manager nghet la lut loin club lian la enkawl ngai lo Ralf Rangnick chu manager lailawk ni turin an lalut thung. German manager hnuaia Man United fixture match hmasa lam a nem chungin point an hloh nasa.

Rangnick-a hote hi Wolves leh Man City lakah an tlawm tawh a; Newcastle, Aston Villa, Burnley, Southampton leh Watford te nen an inhnehtawk. Point 21 hmuh theih aṭangin point nga chauh an hmu a, point 16 ngawt an hloh tihna a ni.

Kane a telna
Tottenham-in manager ṭha Conte an nei ringawt lo a, England captain Harry Kane an kawl. Nipui bazarah Manchester City-in English striker hi euro maktaduai 150 chuangin an dawr a, Spurs-in an chelh.

Pep Guardiola-a'n Kane lakluh tuma sum a sen huai avangin English striker hi a ṭha tih a chiang. A thiamzia nemnghet turin Kane hian Etihad Stadium-ah goal hnih khungin Spurs a chakpui a, England captain vulna hmunah hian Man United an mualpho thung.

Kane hian Everton an sawp ṭum pawhin goal hnih a khung a, amah thlawp tur hian Son Heung-min leh Dejan Kulusevski te an la awm bawk avangin Harry Maguire hote mualpho nawn thei dinhmunah an ding.

Toffees an sawp ṭum hian Rodrigo Bentancur leh Lucas Moura te squad-ah an awm leh tawh a, Uruguayan midfielder Bentancur-a'n bul a ṭan. London club tana chanchin lawm lo erawh hliam vangin left back Ryan Sessegnon lakchhuah a ni a, inhliam sa Oliver Skipp (ṭhal) leh Japhet Tanganga (khup) te nen Man United an hmachhawn thei lo ang.

United ve thung
Manchester Derby-ah Rangnick-a'n formation danglam tak a hmang. Bruno Fernandes chu 'false nine' ah hmangin centre midfielder Paul Pogba pawh a awm hma hle.

German manager Rangnick-a game plan a hlawhchham tih chu goal luh danah a lang a, Spurs lakah erawh game plan thar a neih leh a rinawm. Edinson Cavani-a'n training a zawm tawh avangin Uruguayan striker hi chhawr theih a ni tawh dawn a, Cristiano Ronaldo erawh training a hrana a la neih avangin a dinhmun a la chiang lo.

Rangnick hnuaiah Marcus Rashford a tlatlum lo a, English forward hian a hmalam hun ngaihtuah a ngaih thu a sawi hial. Man United hian engtin nge tlarhma an rem dawn tih hriatthiam a har a, German manager hian rawlthar Anthony Elanga a duhsak tih erawh a chiang.

Spurs lakah hian Elanga a chhawr zel dawn em, tih a hriat loh a, chutihrualin duh thlan tur erawh a ngah bik lo. Rashford bakah Jesse Lingard te chu thlan theiha awm an ni a, player pahnih hian match fitness an nei ṭha lo ve ve.

Tun hnaia an khelh danah Man United tlarhma a bil tih thup rual a ni lo a, amaherawhchu Jadon Sancho bakah Pogba leh Fernandes te awmna team an nih avangin an khelh ṭhat ṭumah erawh team dang daih an ni thei bawk.

Top 4 chu
Arsenal, Man United, West Ham, Tottenham leh Wolves ten top four an la beisei vek thei a, club lian pathum Gunners, Red Devils leh Spurs ten enbik an hlawh.

London club-in Mikel Arteta hnuaiah nasa takin an insiamṭha a, Champions League khel turin an dinhmun a ṭha. West Ham leh Wolves erawh an player neih dan thlirin season tawp lam pressure an zawh a rinawm loh.

Gunners elpui tur bera ngaih chu Man United leh Spurs te an ni a, hemi a nih avang hian zanin inkhel tur hi a pawimawh hle.