Liverpool-ah Luis Diaz a hlim

January transfer-a Liverpool zawmtu Luis Diaz chuan Merseyside club-ah a hlim thu a sawi a, "Mumang ram ang maiin bul ka ṭan a ni ber a, kan duh ang takin Anfield-ah hian bul ka ṭan ṭha a ni," a ti.

Kum 25 mi Diaz hian Reds a pan hnuah inelna hrang hrangah match kua khelin goal khat a khung tawh a, a inkhel en ṭhinten statistic aṭang ringawta teh chi a ni lo tih erawh an hria ang.

Diaz chuan, "Club-ah rang taka ka tlangnel nghal thei hi keipawhin mak ka ti zawk a, ka duh ang takin engkim a thleng a ni ber mai. Training-na leh khelmual thlengin, ka khelhpuite nen kan inman nghal em em a ni," a ti.

Colombian forward chuan sawi zawmin, "Reds inkhel hi ka lo thlir fo ṭhin a, mahse, TV aṭanga en ang ngawt chu a ni lo. A hmun ngeia awm chilh chuan player-te thiamzia ka hmu a, khawi position-ah pawh hian an ṭha em em vek mai a ni," a ti a, Anfield nuam a tih hmel hle.

Liverpool hian zanin dar 6:00-ah league match khel turin Brighton & Hove Albion an lenchilh dawn a, league table-ah pahnihna an ni mek - hmahruaitu Manchester City chu point rukin an phak lo mek a, match khatin an khel tlem thung.