Marsch hnuaiah Leeds chak thei lo

Leeds United-in result ṭha duhin Marcelo Bielsa an ban a, Jesse Marsch an lalut. American manager Marsch hnuaiah Whites-in Leicester City an hneh lo a, Ningani zan khan Elland Road-ah Aston Villa lakah 3-0 ngawtin an tlawm.

Leeds hi table-ah 16-naah an awm a, relegation zone-a awm Burnley aiin match hnih ngawta an khel tam chungin point hnih chauhin an hmu tam. Whites hi league match hnuhnung parukah an chak lo vek a, thla hnih khat chhung lekin an dinhmun a derthawng ta hle.

RB Leipzig manager hlui Marsch chuan, "Tuna kan dinhmun avang hian ka hlauthawng lo. Hun khirh tak kan tawng tih kan pawm a, hemi hmachhawn tura rawn kal hi ka ni," tiin chona a hmachhawn ngam thu a sawi.

Leeds United hian March 13, Pathianni zan dar 7:30 hian table mawngphaha awm Norwich City an hmachhawn dawn a, Marsch leh a hote tan inkhel pawimawh bik a ni ang.