Bus leh jersey a awm chuan a tawk - Tuchel
Russia-in Ukraine a run avangin an theihna zawnah na takin United Kingdom sorkar a che a, tun hnaia Russian mi hausa pasarih a hrem zingah Chelsea neitu Roman Abramovich a tel.
UK sorkar thutlukna avangin zawrh lai mek Chelsea chu hralh theih a ni lo a, an sumdawn a rem lo a, an zin leh khelmuala inkhel an thlenah sum hman phal chin bituk sak an ni a, ticket pawh hralh an phal lo.
A theihna zawng zawngah UK sorkarin Abramovich a hrek a ni ber a, a tuartu chu Chelsea an ni. Mahse, thuneituten hrek zawh rual loh thil an nei a, chu chu huaisenna leh beiseina chu a ni.
Nilaini zan khan Chelsea hian Premier League-ah Norwich City chu 3-1 in an hneh a, Blues manager Thomas Tuchel chuan, "Jersey hak tur kan neih a, zinna tur bus kan neih chhung chuan theihtawp chhuahin kan bei zel ang," a ti - Chelsea fans, in mittui a hnam elaw?
Hmangaih Chelsea
Russia-in Ukraine a run tirh khan Chelsea fan-ten an club-in a tawrh ve dan tur an ngaihtuah phak lo. Mahse, pa luhlul Vladimir Putin-a'n mi ngaihdan la loin ama ngaihdanin Ukraine a run chhunzawm a, rin loh lamah Russian mi hausaten an tuar.
UK sorkarin Russian mi hausate hrek dan a ngaihtuah tih hriain Abramovich-a'n rang takin club hralh a tum a, a zuar hman a, a hralh hman ta lo - hetiang boruak chhe karah Blues tan inkhelh chhunzawm a ngai a, an inlungrual sawt em ni chu aw, tih mai tur a ni.
Norwich khelmualah pawh Chelsea-in minute 14 chhungin goal hnih an khung hman a, Trevoh Chalobah leh Mason Mount ten goal khat ve ve an khung - Chalobah khung tur siamsak a, goal hnihna khung zuitu Mount-a'n Chelsea badge fawp chungin a goal khung a lawm a, Blues a hmangaihzia a lantir.
Tlak hlau Canaries tan Teemu Pukki chuan penalty hmangin si phurh sut ṭhen mah se a team beiseina a chhi nung zo lo a, minute 90-naah Kai Havertz chuan chak nemnghehna goal a khung.
Lungphang lo la
Tuchel chuan, "Kan chunga thil a lo thlen angin kan hmachhawn zel ang. Nimina thil thleng kha a lo thleng dawn tih ka hre lo a, naktukah eng nge thleng dawn ka hre hek lo," a ti a, a êng zawngin a thlir lui.
Blues ṭantuten an club siam liantu Abramovich an theihnghilh lo a, Norwich an hneh zanah a hming lam chungin an zai. Tuchel chuan, "Pawn lamah thil lian tak a thleng a, min tibuai lo tih rual a ni lo. Kan thil hriatte hi a hraw em em zel a, kan thlak danglam thei si lo," a ti.
Women's Super League lamah pawh Chelsea hmeichhe team an chak a, West Ham chu 4-1 in an hneh. Chelsea hmeichhe team coach Emma Hayes chuan, "Ukraine-a indona hre reng chunga ngaihtuahna sen harsa ka ti.
"Chelsea kan ni a, kan tho leh ang. Kan buaina chinfelna hi a awm ngei ang tih ka ring a, kan dawhtheih a ngai a ni," tiin fans a hnem.
A tam mah mah!
Chelsea-in hrem vangin player an lei a rem lo a, an hralh a rem lo bawk. Chu mai a ni lo - contract zo tur player-te pawh contract thar ziahpui a rem lo a, Blues fans tan hawina lam apiangah buaina a awm a ni ber.
Hetihlai hian Chelsea sponsor tu pakhat, telecommunications company Three chuan Blues nena an thawhdunna chu thu leh awm hma atan an titawp a, Three hian Chelsea hi kum khatah pound maktaduai 40 an pe ṭhin.
Chelsea kawr bana intarlang Hyundai pawhin Blues nena an thawhdunna an ngaihtuah ṭhat tur thu an sawi a, car siam ṭhin company hian kum khatah pound maktaduai 10 an pe thung.
Nike chuan Chelsea nena an inkar an la sawi duh rih lo a, anni hian kum 15 chhung atan Blues hi pound maktaduai 900-in inremna an neihpui a, Stamford Bridge an hnuchhawn ve ngat chuan Blues buai a zual khawp ang.