Nets tan Durant leh Irving

Kevin Durant leh Kyrie Irving te chu Brooklyn Nets chakna hnar an ni. Nimin zing NBA regular season inkhelah Nets hian Philadelphia 76ers chu 129-100 in an hneh a, an player hlui James Harden lakah zahngaihna an lantir lo.

Thla hmasa lawk khan Nets leh Philadelphia hian player an inthleng kual. Harden-a'n Philadelphia a pan laiin, Ben Simmons leh Seth Curry te chu Nets lamah an kaltlung, player an inthleng kual hnuah tun ṭum hi an intawn lehna hmasa ber a ni.

Durant-a'n point 25 a neih bakah rebound vawi 14 a la a, ani bakah hian point 24 neitu Irving a che ṭha bawk. A club hlui lakah Harden-a'n minute 29 hun a hmang a, point 11 a nei. 76ers player zingah Joel Embiid (27 points) chiahin point 20 a nei tling a, chak turin thlawpna a hmu ṭha tawk lo.

Nimin zing inkhel dangah Golden State Warriors chuan Denver Nuggets chu 113-102 in an hneh. Stephen Curry-a'n point 34 a nei a, basketball inelna sang bera point a neih belhkhawm chu 20,000 a tling ta.

NBA player zingah point 20,000 nei tling thei mi 49-na a ni chiah. Curry chuan, "Ni tin hian hmasawn tumin ka bei ṭhin, a chhanna ka hmuh avangin ka lawm. Mimal ai chuan team chakna hi a pawimawh lai chu a la ni reng," a ti.

Ningani khan Phoenix Suns chuan playoff khel turin an hmun an lo tichiang tawh. Suns hian Miami Heat chu 111-90 in an hneh a, season kal laiah chuan playoff khel tura tling chiang hmasa ber an ni hial.

Suns thiampuipa Devin Booker chuan, "Playoff chu kan hmaah a awm ta. Hma taka tlak kan duh tawh lo, tun hma lama tihsual kan neih tawhte siamṭhain a sang thei ang ber thlen kan duh," tiin a sawi.

NBA - Nimin Results
Brooklyn Nets 129 - 100 Philadelphia 96ers
Golden State Warriors 113 - 102 Denver Nuggets