ISL semifinal: Hyderabad leh Bagan intawng dawn
Nizan khan Indian Super League semifinal hmasa zawkah Jamshedpur FC leh Kerala Blasters an intawng a, he thu buatsaih a nih lai hian result kan hre hman lo.
Zanin dar 7:30-ah semifinal pakhat zawk khelh a ni leh dawn a, team intiat tawk Hyderabad leh ATK Mohun Bagan an intawng dawn - Indian football-a inkhel en châkawm pawl a tling.
ISL league round-ah Hyderabad hi pahnihna an ni a, point 38 an hmu - pathumna Bagan aia an sanna chu point khat chauh a ni a, hei hian team pahnih intiat tawkzia a hrilhfiah.
Thawnthu hlui
League round-ah team pahnih hi vawi hnih an intawng a, match hmasa zawkah 2-2 a inhnehtawkin, a hnuhnung zawkah 2-1 in Mohun Bagan an chak - Hyderabad-in phuba lak an duh dawn.
Hei chauh a ni lo - June thla khan Hyderabad duhlai Liston Colaco chu Bagan hian an thlem lungleng a, nuai 123 velin an lei chhuak. Sum a tam em avangin Hyderabad an ṭang zo lo.
Hyderabad-in ui tak chungin an player duhlai an chân a, hei vang ringawt pawh hian semifinal-a Bagan hmachhawn hi an châk lehzual ang - inkhel a hmuhnawm loh ring suh.
Sum hmang na
Tun season ISL-ah bagan tluka sum hmang na an awm lo mai thei. Colaco an lei hnuah Hugo Boumous chu anmahni ang thoa sum ngah Mumbai City aṭangin an lei chhuak thei a, vaibelchhe hnih an seng.
Boumous hi kum nga chhung contract an ziahpui a, a hlawh atan vaibelchhe 12.5 an seng dawn! Euro 2020 khel zo hlim, Finnish midfielder Joni Kauko pawh Bagan hian an thlem lut thei a, sum an seng nual ang tih a chiang sa.
Bagan hi coach tan pawh an inseng na. December 18 khan coach Antonio López Habas chu a hna aṭangin an chawlhtir a, Goa coach Juan Ferrando chu vaibelchhe 1.2 in an lei chhuak - Goa-a a hlawh let thumin a hlawh an tisang bawk a, kum khatah vaibelchhe ruk vel a hlawh tihna a ni.
Bagan an ṭha?
Sum an hmang nat tluk zetin Bagan an ṭha a, hlawh tam tak nei chunga player ṭha rual enkawltu Ferrando tan semifinal paltlang loh hi mualphona a tling ang.
Bagan hian keeper-ah Amrinder Singh an nei a, a hmaa ding tur Sandesh Jhingan, Subhasish Bose, Pritam Kotal leh Tiri te ho hi anni aia duhthlan tur India-ah an tam chuang lo.
Midfield-a khel turin Motherwell captain hlui Carl McHugh, Kauko, match 15-a goal nga leh assist panga neitu Boumous te an awm a, goal khung turin match 20-a goal riat leh assist vawi thum nei tawh Colaco, Roy Krishna (5 goals, 4 assists), Manvir Singh (6 goals) leh David Williams (4 goals) te ho an awm bawk.
Hyderabad hi
Telugoons (Hyderabad sawina) tan coach Manuel Márquez-a'n khelh duh dan bik a nei a, chu chu goal nawr a ni - zaninah pawh inveng chunga khelh ai chuan goal khung tum chu thupuiah an nei leh ang.
League round-ah pawh Hyderabad hian match 20-ah goal 43 ngawt an khung a, anni aia khung hnem an awm lo - tlarhmaah Bartholomew Ogbeche hian match 17-ah goal 17 a khung thei a, Bagan tan ven bik ṭul tur a ni.
Midfield-ah Nikhil Poojary leh Real Mallorca midfielder hlui Joao Victor te an nei a, defender ṭhangduang Akash Mishra, Manipuri defender Chinglensana Singh leh Spanish defender Juanan te an awm bawk avangin Bagan tan tawh an khirh dawn.
Mizo an awm
ATK Mohun Bagan-in ISL champion ni turin Mizo player mamawh loah an inngai a, Kolkata club hian Mizo player kawl an nei lo.
Hyderabad-in Mizo keeper beiseiawm Lalbiakhlua Jongte leh midfielder Mark Zothanpuia te an kawl a, mahse, Mizo player pahnih hi an kum a la nau deuh avangin player pawimawh an ni phak lo tih erawh hriat a ṭha.
Lunglei tlangval Biaka hian Hyderabad tan match khelh a la nei lo a, Serchhip rawlthar Mark-a hian match thum a khel tawh thung - zaninah an inlan a beiseiawm loh.
ISL Semifinal
First Leg
Nizan Inkhel (Result kan hre hman lo)
Jamshedpur 7:30 PM Kerala Blasters
Zanin Inkhel Tur
Hyderabad FC 7:30 PM ATK Mohun Bagan
Second Leg
March 15, Thawhlehni Zan
Kerala Blasters 7:30 PM Jamshedpur FC
March 16, Nilaini Zan
ATK Mohun Bagan 7:30 PM Hyderabad FC
March 20, Pathianni Zan - Final
*Away goal rule hman a ni lo
*Inkhel pahnih belhkhawma goal khung tam zawkin final an lut ang.