Hnehna nena bul ṭan Osaka

Indian Wells khelh ṭan a ni a, hmeichhe lama champion tura rinkai zinga mi Naomi Osaka chu a match hmasa berah a chak. Japanese star hian Sloane Stephens chu 3-6, 6-1, 6-2 a hnehin second round a inhlangkai.

US Open champion hlui pahnih hi an inkhel tawk hle, set hmasa berah chuan Osaka a che fuh lo. Mahse, set hnihna aṭang erawh chuan nasa takin hma a sawn a, 4-0 a hma hruaiin a hawi kir tawh lo, a tawp thlengin a dingchang.

Grand Slam vawi li champion tawh Osaka chuan, "Thli a thaw nasa, ball kal dan tur chhut dik a harsat avangin inkhelh a awlsam lo hle. Player ṭha ka hmachhawn bawk si avangin chak turin vanneihna ka mamawh takzet a ni," a ti.

Kum 24 mi Osaka hian nikum khan rilru lama harsatna a tawk a, tournament a khel tam lo. World ranking-ah pawh 82-na a ni daih a, a dinhmun siamṭha leh tur chuan kawng thui tak zawh tur a nei dawn.

Osaka hian a match lehpekah chuan Veronika Kudermetova a hmachhawn dawn. Russian nula Kudermetova hi seeded 21-na a ni phak a, first round a bye avangin second round aṭangin inelna a hmachhawn ve dawn chauh.

Hmeichhe world number 2 Barbora Krejcikova chu kiu hliam vangin a inhnukdawk thung. Czech Republic chuan, "Thutlukna siam harsa tak ni mah se ka tana ṭha tur ka ngaihtuah a ngai," tiin a sawi.

French Open-ah Krejcikova hi champion lai a ni a, clay court inelna lian hi May 22 aṭanga khelh ṭan tur a ni. Paris khawpuiah hliam leh harsatna nei loa inkhel turin inpeih a duh a, tennis court-a kir a hmanhmawh duh rih lo.