Goal khung thei lo Barcelona
Tun hnaiah goal an khung hnem avangin fak an hlawh a, mahse Europa League-ah Barcelona chuan goal an khung thei lo. Catalan club hi an mikhual Galatasaray nen 0-0 in an inhnehtawk, last 16 second leg chu Turkey lama khelh a ni tawh ang.
Ningani zan last 16 first leg inkhel dangah, champion lai Sevilla chuan an mikhual West Ham United lakah 1-0 in hnehna an chang. Hammers tan tlang tur chuan London khawpuia an inkhelh hunah goal khung ngei ngei a ngai dawn.
A goal lo
Thlasik bazar hmang ṭha Barcelona tan Nou Camp-a goal khung a harsa lo. Memphis Depay, Ferran Torres leh Adama Traore te hmangin bual an ṭan - mahse, anni pathum hian goal an sual chhuak zo lo.
Bench aṭanga lut Pierre-Emerick Aubameyang-a siamsak chu Frenkie de Jong-a'n a khung teuh hle, mahse goal ban a tih per. Depay-a'n ṭum hnih hun ṭha nei mah se a vannei lo, goalkeeper Inaki Pena a che ṭha ve bawk.
Keeper Pena hi Barcelona aṭanga loan hmanga an hawh lai a ni a, a club pangngai lakah a theihna tak a pholang. Swansea striker hlui Bafetimbi Gomis-a'n mikhual team tan hun tawp dawnah goal a khung, mahse offside vanga hnawlsak a ni thung.
Xavi thukhawchang
Barcelona manager Xavi chuan, "Result lawmawm lo a ni, chutihrualin football-ah chuan hetiang hi a thlen chang a awm. A nihna takah chuan a tir aṭangin kan nawr na hle, hma taka goal khung thei ni ila engkim a awlsam ang.
"Napoli kan hmachhawn ṭum pawhin tun ang boruak kha kan tawng tawh. Turkey-ah chuan boruak a danglam tawh ang," a ti. Spanish manager hian La Liga lamah chuan goal khung an harsat loh a beisei thu a sawi bawk.
Catalan club hian Pathianni zan dar 1:30-ah league match an khel zui leh nghal dawn, anmahni mualah bawk Osasuna an mikhual ang. Xavi naute hian champion tum ngam tawh lo mah se, a sang thei ang bera season khar an tum ang.
Hammers an tlawm
David Moyes-a naute hun rei tak an inveng thei, mahse minute 60-naah Munir El Haddadi chuan Marcos Acuna-a freekick aṭanga ball kal a khung a, mikhual English club lamin a chhanletna tur an nei lo.
London club hian 1981 hnuah European football-ah knockout stage an khel leh chiah a, hun rei tak hnuah kir leh chauh an nih avangin a awlsam lo, an hneh loh Sevilla erawh champion lai an ni thung.
Hammers hi an vannei tawk lo. Nikola Vlasic-a tauh luh tur ngei nia lang Sevilla goalkeeper Yassine Bounou-a'n a dansak ṭha hle. Julen Lopetegui enkawl Sevilla hi La Liga-a pahnihna ni lai an nih avangin anmahni mualah tawh an khirh ve hle bawk.
Inkhel dang
Glasgow lamah Rangers an che ṭha chhunzawm zel. Steven Gerrard thlaktu Giovanni van Bronckhorst-a'n hna a thawk ṭha. Borussia Dortmund pet chhuaktu hian Red Star Belgrade chu 3-0 in an hneh a, a ke ding lamin quarterfinal an rap tawha ngaih a ni.
Italy ram lamah inkhel hmuhnawm a awm bawk. Atalanta chuan goal an phurh hmasak zet hnuah Bayer Leverkusen 3-2 in an hneh. Serie A club hi attacking game khel ṭhin an nih avangin an tlarhnung a phui tawk lo, goal khung erawh an awlsam ṭhin viau.
Ligue 1 club AS Monaco chuan Sporting Braga 2-0 in an luhchhuah a, anni pawh hi an chesual viau a nih ngawt loh chuan quarterfinal an luh ngei a rinawm. Second leg hi March 17 leh 18-ah khelh leh a ni ang.
UEFA Europa League - Last 16
Barcelona 0 - 0 Galatasaray
Sevilla 1 - 0 West Ham United
SEV: Munir El Haddadi 60'
Rangers 3 - 0 Red Star Belgrade
RAN: James Tavernier 11' (P)
Sporting Braga 2 - 0 AS Monaco
SPO: Abel Ruiz 3'; Vitor Manuel Carvalho Oliveira 89'
Atalanta 3 - 2 Bayer Leverkusen
ATA: Ruslan Malinovskyi 23'; Luis Fernando Muriel Fruto 25', 49'
BAY: Charles Aranguiz 11'; Moussa Diaby 63'