Saudi Arabia-ah hmeichhe league kalpui

Covid-19 vanga ruahman anga an khelh theih loh reng hnuah Saudi Arabia rama hmeichhe football league hmasa ber chu khelh ṭan a ni ta a, Riyadh, Jeddah leh Dammam khawpui aṭangin club 24-in inelna hi an hmachhawn - player 600 chuang zet an awm bawk. 

Thawhlehni tlai khan match hmasa ber hi khelh a ni a, television lamah pekchhuah ni lo mah se Saudi media chuan infiamna khawvela hmeichhiate inhnamhnawih theih nana hmalakna ṭha tak a nih thu an sawi. 

Saudi Arabia hian kum 2018-ah khan hmeichhia tan a hmuna inkhel en an phal ve chauh a, thuneitute chuan hun rei tak chhung chu infiamnaa hmeichhe inhnamhnawih hi an phal lo - an hnam kalphung leh sakhaw zirtirna a kalha an ngaih vang a ni.

A ram chhunga mi cheng 93% vel zet Muslim an nihna Saudi-ah hian sakhaw puithiam ṭhenkhat chuan infiamnaa hmeichhe tel tir chuan sual lamah hmeichhiate a tluk luh tir turah an ngai. 

Mahse, Thawhlehniah erawh engkim a danglam ta a, Saudi Women's Football League (WFL) inelna ṭan niah hian match sarih ngawt inkhel a awm nghal. 

Inkhel result ngaihnawm tak tak a awm nghal a, Tigers chuan 11-0 zetin Jeddah Challenge an sawp a, Al Riyadh chuan 10-1 in Najd Al Riyady an sawp ve bawk. 

Sorkar thuhnuaia awm Saudi Sports for All Federation (SFA) chuan WFL kaltlang hian hmeichhiate hmasawnna an thlen tur thu leh infiamna luhchilh tura an tih phur tur thu an sawi - inelna champion hian £100,000 (Nuai 98.37) an dawng ang.