Newcastle United an him tawh?
Premier League club zinga neitu hausa ber Newcastle United-in kumin chhungin hneh loh an la tawng lo a, match hnuhnung pasariha vawi ruk ngawt an chak avangin point 31 hmuin table-ah 14-naah an awm tawh.
Magpies hian Ningani zan khan St Mary's Stadium-ah Southampton 2-1 in an lehthal. Saints hian Stuart Armstrong hmangin goal khung hmasa mah se mikhual team-in player thar Chris Wood leh Bruno Guimaraes te hmangin an chhanglet.
Tlak hlau
Newcastle United hian Steve Bruce hoin season bul an ṭan a, English manager kaihhruaina hnuaiah match riat khel hmanin vawi khat mah an chak lo.
Saudi Arabia Public Investment Fund-in Bruce-a chungah dawhtheihna lantir hmasa mah se an dawh rei thei ta lo a, Tottenham laka an tlawm zawhah October 20 khan Manchester United defender hlui hi a ban.
Manager nghet an zawn chhungin Graeme Jones-a'n a enkawl a, match thum enkawl hmanin chak an nei chuang lo - vawi hnih inhnehtawkin vawi khat an chak lo.
Magpies-in Eddie Howe chungah rinna an nghat a, mawhphurhna an pe. Bournemouth manager hlui hnuaiah hma an sawn chak lo. Match hmasa pakuaah vawi khat chiah an chak a, December thlaah phei chuan a zawna vawi thum chak loh an nei hial.
Howe-a'n Newcastle a enkawl ṭan hian 19-naah an awm a, an dinhmun a ṭha lo. Kum 2021 pawh an khar ṭha lo - nikum kum tawp khan 19-naah tho an awm a, table mawngphaha awm Norwich nena an inthlauhna pawh point khat chauh a ni.
Harhtharna chu
January transfer-ah Newcastle-in Kieran Trippier an lalut a, England international an lak zawh hian Chris Wood, Bruno Guimarães leh Dan Burn te an lak bakah loan hmangin Matt Targett an la bawk. Magpies hian kum 2022-ah bul an ṭan ṭha ta a, match thum a zawnin an chak - Trippier-a'n freekick aṭangin ṭum hnih a khung.
Trippier a inhliam a, West Ham nen inhnehtawk zui mah se Newcastle harhtharna a la reh lo. Magpies hian match hnuhnung pathumah hnehna an chang vek a, Ningani zana Southampton an hneh ṭum pawhin player thar Wood leh Guimaraes ten club tan a vawi khat nan goal an khung.
Wood hi boruaka a ṭhat vanga lak a ni a, club tana match riat a khelhnaah a lu hmangin a khung. Brazilian midfielder Bruno pawh a man a to a, a goal khung dan pawh a mawi. Lyon aṭanga Magpies zawmtu hian mawi zetin a khenglut.
An him tawh?
Premier League-a him tur hian point 40 hmuh a ngai an ti ṭhin a, Newcastle hian match 11 khelh tur la awmah point 31 an hmuh tawh avangin an himah a ngaih theih. Kumin bik thlir phei chuan Mapgies hian hmahruaitu Manchester City chiah an pha lo.
Howe-a naute hian kumin bika match riat an khelh aṭangin point 20 an hmu a, an tluk loh Man City hi anni aiin match khatin an khel tam a, point 22 an hmu. Newcastle chet ṭhatzia sawifiahtu chu kumin bikah Liverpool (19 pts) leh Chelsea (15 pts) te aiin khelh zat inangah an hmu tam zawk.
Newcastle hi an result a ṭhat ang chiahin fan-te nena an boruak pawh a ṭha a, khelmual chhunga inkhel nung tak thlawp turin entu mipui thawm a ṭha ṭhin hle. Saints nena inkhel en tur pawh hian Newcastle aṭangin Magpies ṭantu mi 3,300 zet chu Southampton-ah an zin a, khaw pahnih inkar hi 1,050 km vel zet a ni.
Magpies hian March 13, Pathianni zan dar 7:30 hian Stamford Bridge-ah khelmual pawna buai Chelsea an tlawh dawn a, Howe-a naute hi World leh European champion lakah fiahin an awm dawn.