A vawi khat nan RVL an tlawm

Mahuma Memorial 1st Division Screening Tournament 2021-22-ah, Ramhlun Venglai chu a vawi khat nan an chak lo. Nimin league round inkhelah RVL hi Hunthar lakah run rukin an tlawm a ni.

Suaka Cricket Ground, Sihhmuia inkhelah Hunthar hi ṭhum vawrah an vannei zawk a, vuak hmasak an thlang. Over 36 chhungin run 128 siamin an thi kim a, target sang an siam thei lo.

RVL tan harsa lo taka umphak theih tur niin a lang. Mahse, Joseph Lalthankhuma'n run 41 a siam bak chu run siam hnem an awm lo, over 32 lekah run 122 chauh siamin an thi kim der; inelna kal laia a vawi hnih nan Hunthar an chak.

Vawiin hian a hmun ngaiah inkhel pakhat a awm leh dawn. Chawhma dar 9:00-ah Legends leh Kulikawn an inkhel dawn a ni. Ruahman dan chuan March 23, Nilaini thleng league round khelh a ni dawn. March 26, Inrinniah final khelh a ni ang.