RoundGlass Punjab lakah Aizawl FC an vanduai
I League khelh mekah Aizawl FC-in point an la hlawh chhuak lo. Nimin tlai khan Mizo club hi RoundGlass Punjab lakah hun rei zawk hma hruai mah se injury time-ah goal hnih an chhuah avangin 4-3 in an tlawm - an vanduai takzet.
Kalyani Stadium-a inkhelah Aizawl FC hian David Lalhlansanga leh Ramhlunchhunga te hmangin ṭum hnih hma an hruai a, Punjab-in CK Vineeth leh Joseba Beitia te hmangin an sut ve ve. Mizo club-in Asier Dipanda Dicka hmangin hma an hruai nawn a, amaherawhchu minute 71-naah Vanlalnghenga hnawhchhuah a nih avangin player 10-in an khel.
Hun tawp lamah Punjab-in an nawr na a, injury time-ah Kurtis Guthrie hmangin siphurh an sut zo. Minute nga pek belhah Mizo club an tlu sawp a, Bikash Yumnam-a'n hun pek belh minute linaah Punjab chakna goal a khung.
Mizo club-in Covid-19 hri kai vanga match hmasa pahniha an chhawr theih loh Dicka, Ayush Chhetri leh Samuel Lalmuanpuia te bul an ṭantir nghal a, football hmuhnawm an lantir.
Yan Law hote chak duhin an tuihal tih a hriat a, game hmuhnawm tak khel mah se an vanduai a, an fimkhur tawk lo bawk. First half-ah Dicka goal hnih chu offside vangin pawm a ni lo a, Mizo club-in hmahruai fal theihna hun ṭha an bawhpelh.
Second half ṭantirhah Dicka penalty hmangin hma an hruai nawn a, minute 90 thlengin goal an chhuah lo. Cameroonian striker Dicka hian 3-2 a hma an hruai lai hian hnai tak aṭangin chance ṭha bik a hlah.
Mizo club tan mangchhia a thleng a, injury time-ah Guthrie leh Bikash ten Punjab tan goal an khung. Aizawl FC-in football nunrawnzia an hre nawn a, thil thlen dan hi pawm thiam a har khawp ang.
Round 4
Nimin Inkhel Results
Rajasthan FC 0 - 0 Sudeva Delhi
RoundGlass Punjab 4 - 3 Aizawl FC
RGP : CK Vineeth 38'; Joseba Beitia 45' (P); Kurtis Guthrie 90+2'; Bikash Yumnam 90+4'
AFC : David Lalhlansanga 24'; Ramhlunchhunga 40'; Asier Dipanda Dicka 47' (P)
Real Kashmir 7:30 PM Sreenidi Deecan
Vawiin Inkhel Tur
Trau 2:00 PM Churchill Brothers
Gokulam Kerala 4:30 PM Kenkre
Mohammedan 7:30 PM Indian Arrows