Champion turin ka lo kir leh ang - Marquez

Marc Marquez chuan MotoGP champion ni turin tlankawngah a kir leh thuai tur thu a sawi a, a elpui rider tan chuan thu ngaihthlak nuam leh lawmawm tak chu a ni lo ang.

Honda rider hi a dam ṭha a nih phawt chuan midang chunga leng a ni. Tun hnai season sarih chhungin vawi ruk a champion thei, tun hnaiah bik phei chuan a zawmin vawi li ngawt a chungnung ber a ni.

Mahse, tun season erawh atan anchhia a ni thung. Season bul ṭanna Jerez tlankawngah a che sual a, a ban ruh zai a ngai hial. Hun rei vak lo hnuah rawn kir tur anga sawi ni mah se tun thlengin a la tlan leh lo - a awm loh hlanin Suzuki rider Joan Mir a champion.

Marquez chuan, "Season tin mai hian nomawi chawi tumin bul ka ṭan ṭhin, season tharah pawh ka ngaihtuah dan hi a la danglam chuang lo ang. Nomawi chawi ngei tumin ka bei leh dawn a ni.

"Amaherawhchu tun hma aiin inelna a hautak zawk ngei ang tih a chiang, season kal lai hi ka lo en ve reng ṭhin a, rider ṭhenkhat an chet ṭhat bakah theihna an nei sang hle, inelna a awlsam dawn lo hle a ni," tiin a sawi.

Hri leng vangin MotoGP hi ruahman lawk angin an tlan thei lo, a hmuna entu awm loin inelna erawh an nei tlang ta tho, champion awm tawh mah se inelna neih hmabak pakhat an la nei. 

Season tharah pawh buaina karah inelna an neih chhunzawm leh ang, hmun ṭhenkhatah chuan fans an awm thei tawh tura beisei a ni thung.