Gibraltar an hlim

Football-ah Gibraltar-in sulhnu ṭha an la nei lo a, May 2013 khan UEFA-in member pakhatah an pawm chauh. Los Llanis tiha an koh Gibraltar hian international match an khelh hmasak ber aṭanga kum sarihnaah an ram tana chanchin ṭha bik an hlawh chhuak.

Gibraltar hi an mual Victoria Stadium-ah Liechtenstein nen 1-1 in an inhnehtawk a, league hniam ber League D group 2-ah hmahruaitu niin League C an thleng.

Gibraltar FA chuan an official twitter-ah, "Zan duhawm tak a ni. Gibraltar mipuite u, hei hi in tan a ni," tiin an hlawhtlinna chanah an lawm hle.

Gibraltar hi ram te reuh te a ni a, a len zawng pawh 6.7 Sq km chauh a ni. Kum 2020 chhiarpui aṭanga a lan dan chuan mipui 34,003 chauh an awm a, an tlem hle. An ram tetzia hriatthiam theih dan ber tur chu Aizawl-a cheng hi mi 293,416 an awm a, chu pawh chu 2011 chhiarpui a ni tawh.