Old Trafford-a hlimna leh lawmna thlentu kum 37 mi Cristiano Ronaldo

Etihad Stadium-a mualpho Manchester United-in Inrinni zan khan Old Trafford-ah Tottenham Hotspur an mikhual a, point an hloh a nih chuan season thara Champions League khelh a harsa dawn. Ralf Rangnick-a hoten thilmak an beisei a, chhantu an mamawh. Mamawh chhanna chu Cristiano Ronaldo a ni a, Portuguese forward hi a hun teah rahin hattrick ropui a siam.

Kum 37 mi Ronaldo hi Manchester City an hneh loh ṭumin squad-ah a awm lo. Tottenham lakah erawh Ronaldo-a'n inkhel bul ṭanin, goal ropui nen bul rawn ṭan mah se Spurs-in Harry Kane penalty hmangin an sut. Ronaldo-a'n hmahruaina goal a khung nawn hnuah Harry Maguire-a'n an lamah a tilut a, 2-2 a ni. Chak zawk an awm dawn loa ngaih theih tawh hnuah Ronaldo hian chakna goal a tauh lut a, Man United-in an elpui Spurs 3-2 in an hneh.

Siuuuu
Spurs-in manager ṭha Antonio Conte an neih bakah player ṭha Harry Kane leh Son Hueng-min te an kawl a, football-ah sulhnu nei lian vek an ni. Old Trafford-ah erawh manager ṭha leh player ṭhate hian Cristiano Ronaldo ropuizia a takin an hmu a, a taka hmutu zingah hian American football-a player ropui bera chhal Tom Brady pawh a tel.

Ronaldo hi Old Trafford-a a kir leh hnu hian che ṭha miah lo pawh ni se a sulhnu hnutchhiah tawh avangin a ropui tho ang. Amaherawhchu mi danglam bika duan Ronaldo hian ropui zel a duh a, chumi tur chuan theihna a nei bawk.

Minute 12-na lekah Ronaldo hian Fred-a ball khen mawi zet chu box pawn aṭangin goal kilah kawh tawkin a pet lut a, Old Trafford-a inkhel entute 'siuuuu' thawm a ring ṭha hle. Ball-in Spurs defender Eric Dier kut a per chungin referee Jonathan Moss-a'n penalty a pe lo a, ball-in Alex Telles-a kut a per erawh penalty a pe thung. Kane-a'n minute 35-naah penalty aṭangin siphurh a sut.

Talent nei ṭha Jadon Sancho-a'n a theina a pholang a, Spurs offside trap a bum hnuah Ronaldo goal khung tur a siamsak. Minute 38-naa Portuguese forward goal khung hi awlsamin lang mah se a hun taka a thlen theihna kha player danglam bik a nihna chhanah a chhal theih.

Second half-ah Man United captain Harry Maguire a chesual a, minute 72-naah an lamah a tilut. Old Trafford-ah Man United ṭantute thawm a reh a, penalty pek an nih ve loh bakah tun hnaia an result thlirin point an hloh ngei turah a ngaih theih. Amaherawhchu, Man United-in midang chunga leng Ronaldo an kawl a, Portuguese forward hi a rilru put hmang pawh a dang.

Ronaldo hian minute 81-naah Telles-a corner pet chu a tauh goal a, vawi tam tak a lo tih tawh ṭhin angin hun harsaah a team-te a chakpui. Premier League legend Alan Shearer chuan, "A bu ang thlapin a tauh," tiin Ronaldo chakna goal luh dan a sawi a, Portuguese forward fak nan ṭawngkam ṭha a ui lo.

Record thar?
Kum 37 mi Ronaldo hian kum 2008 khan Man United tan hattrick a siam tawh a, Old Trafford-a a rawn kir hnuah tun hi hattrick a siam lehna hmasa ber a ni. Club leh ram tan Ronaldo hian goal 807 a khung a, professional player zinga goal khung tam bera ngaih a ni.

Man United forward chuan, "Khelmual chhunga let a, team tana chakna goal khung aia nuam a awm thei lo. Kan khelh ṭhat niah chuan eng team pawh kan hneh thei a, chuvangin kan thawhrim a, kan ṭanrual a ṭul. Man United tan tawp chin a awm lo, eng harsatna pawh awm se hmalam pan zel ang," tiin a sawi.

Ronaldo hian goal 805 khungtu Czech-Austrian player Josef Bican a khum chiahah an ngai. Amaherawhchu unofficial statisticians RSSSF leh Czech FA chuan Bican goal khung zat hi 805 angin an ziak leh tawh lo a, goal 950 chuang khung angin an dah leh tawh zawk. Bican-a goal khungah hian amateur leh reserve game-a a khung pawh a tel vek.

Chutihrualin Ronaldo hi top level player zinga goal khung tam ber a ni tih erawh a chiang a, a khung tam ber erawh chiang fakin a awm thei lo. Brazil legend Pele leh Romario bakah Real Madrid leh Hungary chhuanvawr Ferenc Puskas te chu goal 700 chuang khung anga sawi an ni.

Ronaldo elpui Lionel Messi chuan goal 759 a khung ve bawk a, Argentine forward hian ram tan goal 80 khungin club pahnih Barcelona (672 goals) leh Paris St-Germain (7) tan goal a khung nual bawk.

Ronaldo an fak
Cristiano a khel ṭha em em a, chutihrualin amah hi ka hriat chian em avangin mak ka ti hran lo. A chanchin kan sawi mek hi, Messi nena tun hnaia player ṭha ber an ni. Tun hma chhiar tel chuan Maradona leh Pele te an tel bawk. Heng player-te hi team-in an mamawh hun takah an inlar ṭhin.
- Antonio Conte, Spurs manager

Ronaldo hi buaina a ni ngai lo. Football history-a striker ṭha ber team-ah a awm a, engtin nge buaina a nih theih ang. Spurs laka Ronaldo khelh dan leh team khelh dan kha a lungawi thlak a ni.
- Paul Pobga, Man United midfielder

Cristiano Ronaldo hi chu mi mak danglam a ni. Kar liam taa a tel lo thil thleng chhanletna ṭha tak a ni. Inkhel kha Ronaldo show a ni a, a goal kha a special. Pianpui thiamna a nei ṭha a, a kea ball a thiam em em chunga a lu hmanga a ṭha lehzel te hi a mak a ni. Amah hi a kal khat a, khawvela ṭha ber a ni tih hi a inpawm thlap.
- Gary Neville, Man United captain hlui

Ronaldo hian sawisel a tawk a, Spurs laka a khelh dan ang hian amah sawiseltute hi a career chhungin vawi tam tak a chhanglet. Tun season-ah a ṭhat theih dan berin a khel em? kan tih chuan a ṭhat dan ber a ni lo. Mahse Ronaldo a khelh chuan chakna chance a sang ṭhin. Football-a harsa ber chu goal khung hi a ni a, a goal khung zat en hian a ropui thlawt a ni.
- Roy Keane, Man United captain hlui