Monaco mualah PSG an lut dawn

Zanin dar 1:30 hian Ligue 1 champion Paris Saint-Germain chu AS Monaco khelmualah an lenglut dawn a, hliam vanga buai PSG tan fimkhur a ngai dawn - player inlan thei lo tur awm nual mah se inkhel hmuhnawm a beisei ngam ang.

PSG hian league match 10 khelh tawh aṭanga point 24 hmuin hma an hruai mek, 2017 champion Monaco erawhin point 17 hmuin parukna dinhmun an luah thung, an inkar tih zim theihna hun ṭha an neih hi hman ṭangkai ngei an tum dawn.

Monaco manager Niko Kovac chuan, "Inkhel harsa leh pawimawh a ni dawn, PSG hi manager ṭha tak Thomas Tuchel kaihhruaina hnuaia khel an ni a, hun harsa karah pawh ṭha taka khel thei an nih avangin kan fimkhur a ngai hle ang," a ti.

PSG hi an league match hmasa pahnihah an tlawm a, season bul an ṭan chhe hle. Mahse a hnu lamah erawh an chak fai vek, anmahni hnaih bertu Lille aiin point nga ngawtin an sang fal leh tawh, nomawi an humhim thei dawn niin a lang.

Paris club tan Neymar dinhmun a la chiang lo a, Moise Kean, Pablo Sarabia, Mauro Icardi, Idrissa Gueye, Julian Draxler te an la inlan thei dawn lo. Marco Verratti erawh a dam tawh a, Angel di Maria leh Kylian Mbappe te chungah mawhphurhna a sang leh dawn.

PSG hi chak tura rinkai zawk ni mah se Kovac a zam bik lo. Bayern Munich manager hlui chuan, "Khawvel player ṭha tak tak hmachhawn hi kei chuan a nuam ka ti, tunah pawh team kan din chho mek a ni a, kan dinhmun hi engtiang tak nge a ni tih fiahna hun a ni ang," a ti.

Monaco hian hri leng vangin Wissam Ben Yedder an chhawr thei dawn lo a, hliam nei Ruben Aguilar, Aleksandr Golovin leh Benjamin Lecomte te an la inlan thei lo bawk ang.