ISL Semifinal ; Puitea telna Blasters an chak
Indian Super League semifinal first leg chu khelh a ni ta a, Zirtawpni zan khan K. Lalṭhathanga (Puitea) khelhna Kerala Blasters chuan Ricky Lallawmawma leh PC Laldinpuia te khelhna Jamshedpur FC chu 1-0 in an hneh.
Blasters tan Sahal Abdul Samad chuan inkhela goal awmchhun hi a khung a, Jamshedpur lamin a chhanletna tur an neih loh avangin an tlawm - second leg khelh tur a la awm a, away goal rule hman a nih loh bawk avangin JFC tan beisei a la bo lo.
Inrinni zan khan semifinal pahnihnaah Hyderabad FC chuan 3-1 in ATK Mohun Bagan an hneh bawk a, Kolkata club tan Roy Krishna chuan goal hmahruai khung mah se Hyderabad tan Bartholomew Ogbeche, Yasir Mohammad leh Javier Siverio ten an chhanglet.
Goal khat chauh
Jamshedpur-in inkhel bul ṭan ṭha mah se goal an khung thei lo a, Daniel Chima Chukwu leh Pronay Halder ten chance duhawm an hlah a, minute 38-naah an goal khung theih loh rah an tuar zui.
Blasters forward Alvaro Vazquez-a ball thlawh luh chu Ricky Lallawmawma'n lo tauh chhuah tum mah se Sahal-a ke bulah tak a tla a, kum 24 mi Indian midfielder hian goal-ah a chantir.
Ricky chuan, "Inkhel ṭantir aṭangin kan nawr nghal a, kan chance neiha goal kan khung theih loh kha kan tuar ta a ni. Mahse, goal khat chiah a ni a, beidawn phahna tur a ni lo," tiin Vanglaini a hrilh.
A la tawp lo
Blasters tan Puitea'n minute 90 a khel tluan a, Bethlehem Vengthlang tlangval hian a khel ṭha hle. Puitea chuan, "Ka mimal khelh dan ka ngaihtuah lo a, team-in hnehna kan chan avangin ka lawm a ni.
"Team boruak a ṭha a, kan chak avangin kan lawm. Mahse, 1-0 chauh a la ni a, final kan la lut lo. Tunah hian first half chauh la khel ang kan ni a, inkhel a la tawp lo," tiin inthlahdah thei an nih loh thu Vanglaini a hrilh.
Men of Steel tan hliam vangin Laldinliana Renthlei a inlan thei lo a, Ricky bakah Dinpuia ten Jamshedpur tan minute 90 an khel tluan. Ricky chuan, "Kan tlawm avangin kan hnual lo a, final luh kan la beisei reng," tiin second leg-ah 'comeback' an tum thu a sawi.
Hyderabad an chak
ISL-a team hmuhnawm ber pawl chu Hyderabad an ni a, anni aia a leta sum hmang tam Mohun Bagan chungah pawh zahngaihna an lantir lo - Kolkata club lakah 3-1 in an chak a, Bagan tan 'comeback' a harsa tawh ang.
Bagan hian inkhel ṭantir aṭangin an nawr na nghal a, Roy Krishna chuan minute 18-na lekah goal hmahruai a khung nghal. Mahse, Hyderabad chhaih kawlhna goal a chang a, Ogbeche chuan first half hun pek belhah si phurh a sut.
Kolkata club bawkin second half-ah bul ṭan ṭha mah se an chance neih an chhawr lo a, Yasir Mohammad leh Javier Siverio-ten Hyderabad tan an khung leh zui bawk si avangin Telugoons (Hyderabad sawina) an chak.
ISL Semifinal
First Leg
March 11, Zirtawpni Zan
Jamshedpur 0 - 1 Kerala Blasters
KER: Sahal Abdul Samad 38'
March 12, Inrinni Zan
Hyderabad FC 3 - 1 ATK Mohun Bagan
HYD: Bartholomew Ogbeche 45+2'; Yasir Mohammad 58'; Javier Siverio 64'
AMB: Roy Krishna 18'
Second Leg
March 15, Thawhlehni Zan
Kerala Blasters 7:30 PM Jamshedpur FC
March 16, Nilaini Zan
ATK Mohun Bagan 7:30 PM Hyderabad FC
March 20, Pathianni Zan - Final
*Away goal rule hman a ni lo
*Inkhel pahnih belhkhawma goal khung tam zawkin final an lut ang.