Liverpool an chak; Salah a chhuak mai thei!

Inrinni zan Premier League inkhelah Liverpool chuan 2-0 in Brighton & Hove Albion an hneh a, Luis Diaz leh Mohamed Salah (penalty) ten goal khat ve ve an khung.

Liverpool-in hnehna an chan avangin hmahruaitu Manchester City chu khelh zat inangah point thum chauhin an thlau ta a, Pep Guardiola naute hian zanin dar 1:30-ah league match khel turin Crystal Palace an lenchilh ang.

Reds-in hnehna an chan leh tak avangin Premier League nomawi inchuh boruak a 'hot' leh ta sawt a, mahse, Liverpool inkhelh zawhah nomawi inchuh boruak aiin Salah-a chanchinin sawi a hlawh zawk.

Amex Stadium-a inkhel zawha sawi hlawh zawk erawh Reds chak aiin Salah chhuak thei anga sawi awm chungchang chu a ni a, Egyptian forward hian Anfield-ah contract thar a la ziak thei lo!

Salah a hliam
Liverpool tan Luis Diaz chuan minute 19-naah goal hmahruai a khung a, Colombian forward hian Joel Matip-a ball pek ṭha tak chu keeper Robert Sanchez man hman lohin a tauh lut.

Diaz laka a chet dan avanga hnawh chhuah loh Sanchez a vannei a, mahse, Reds bawkin inkhel an thunun. Minute 61-naah penalty an hlawh chhuak zui a, Yves Bissouma handball vanga an penalty hlawhchhuah hi Salah chuan goal-ah a chantir.

Egyptian forward hi minute 65-naah hliam vangin lakchhuah a ngai zui a, Reds manager Jurgen Klopp chuan, "Dik lo a awm a ni," tiin a player inhliam hi sawi mah se Salah chuan a hliam a serious loh thu a sawi.

Liverpool hian Nilaini zan dar 1:45-ah league match khel turin Arsenal an lenchilh zui dawn a, sawi anga Salah hliam hi a serious lo a nih chuan Emirates Stadium lenglut thei tura ngaih a ni.

Buaina ral
Liverpool-in League Cup nomawi an chawi tawh a, FA Cup leh Champions League quarterfinal an lut tawh a, Premier League-ah champion an la beisei bawk - boruak dang an mamawh loh lai takin Salah-a'n contract thar an zawrh chu a pawm duh lo.

Klopp chuan, "Mo hian he club hi tum sang zawk nei turin min duh a, a duh ang ngei kan ni bawk. Club chuan a tihtheih ang chu a ti tawh a, Mo-a kutah engkim a innghat tawh a ni. Sawi belh tur pawh a awm lo a, engkim a ṭha vek e.

"Ka hmuh danah chuan thil engkim hi a nih tur angin a thleng ve rih a ni mai a, contract ziah a awm lo a, hnar pawh a awm chuang lo. Kan nghah det a ngai a, buaina tur a awm lo," tiin a sawi.

Klopp-a thusawi zawhah hian Salah-a agent Ramy Abbas Issa chuan twitter lamah emoji nui lai lem a hmang a, Klopp-a thusawi a nuih letna anga ngaih a nih avangin khawthlang media titi a tling nghal.

A tam lua
Salah-a'n Liverpool-a cham a duh thu a lo sawi tawh a, "Liverpool kutah engkim a innghat a, thil uchuak ka phut hek lo," a ti a, Klopp-a'n, "Salah kutah engkim a innghat," tiin a sawi ve tawh thung!

Salah hlawh phut zat hi tarlan awm lo mah se kar khata £400,000 - £500,000 inkar vel hlawh a phut anga sawi a awm. Mahse, Liverpool hian an player-te hlawh uchuak an pe ngai lo.

Reds-a player hlawh hnem ber ni mek Virgil van Dijk hian kar khatah £2,20,000 a hlawh mek a, Salah hian £200,000 a hlawh mek thung - tuna a sum phut ang zat hi Reds hian pe dawn ta se an kalphung nghet tak an thlak a ngai dawn tihna a ni a, an inrem a rinawm loh zawk.

Liverpool hian Salah hi kar khatah £500,000 pe ta se, an player langsar zawng zawngin hlawh tam zawk an beisei ve zui dawn tih chu thil chiangsa a ni a, Reds tan sum tam taka Salah chelh aiin kaltir a fuh zawk ang.

A harsa dawn
Salah hian June 2017 khan Liverpool hi a zawm a, Premier League, Champions League, League Cup, FIFA Club World Cup leh UEFA Super Cup-ah te champion nomawi a chawipui a, fans atchilh rawn a ni.

Kum 29 mi forward hian Liverpool tan inelna hrang hrangah match 238 khelin goal 153 a khung a, assist vawi 57 a nei bawk - tun season-ah match 35 khelin goal 28 a khung a, assist vawi 10 a nei bawk.

Liverpool-a goal khung thei dang pahnih, Diogo Jota (17 goals) leh Sadio Mane (14) ten tun season-a an khung belhkhawm hi goal 31 a ni a, hei hian Reds tana Salah thawhhlawkzia a hrilhfiah.

Chutihrual chuan Liverpool hian coach atan Jurgen Klopp an nei tih hriat a ṭha a, Salah chhuak ta se, tlarhmaah Roberto Firmino, Mane, Jota leh Diaz an la nei dawn tho - mangan viauna tur niin a lang lo.

Sum nge ropuina?
Tuna zawhna awm chu, Salah hi chhuak dawn ta se, khawi club nge a zawm ang? tih chu a ni. Kum 29 mi forward hian Premier League-a cham hram a duh nia sawi a ni a, a club hlui Chelsea erawh an talbuai mek avangin a zawm theih a rinawm loh.

Chuti a nih chuan a hlawh phut ang zat pe thei chu Manchester United leh Manchester City chiah English club-ah an awm dawn tihna a ni a, hmelma club panin a puanthuah a tel duh ang em?

United legend Rio Ferdinand chuan, "Duhthlanna chu Mo-a kutah a awm. Eng nge a duh ber? Anfield-a cham a, Liverpool legend nih kumkhua nge a duh zawk sum? Kan la hre thuai dawn," a ti a, Premier League tiropui zel turin Reds chuan chelh hram se a duh thu a sawi bawk.

Premier League pawn club zingah Barcelona chuan Salah an ngaihven viau nia sawi a awm a, Kylian Mbappe chân thei dinhmuna ding mek Paris St-Germain pawhin chance an neih chuan an bawhpelh lo ang.

Manchester City inkhel kan en chuan an hmabak match zawng zawngah an chak vek a rinawm hial - keinin kan tih theih chu a tam thei ang bera hnehna chan a ni a, kan inpeih a ni. 'Nomawi inchuh' tia kan inkhel hi sawi kher a ngai lo a, match tina chak hi kan duh chu a ni mai. - Jurgen Klopp, Liverpool manager