Match 16 chak zawn Nadal

Rafael Nadal tan season duhawm a la ni chhunzawm zel. Spanish star hian kuminah match 16 a khel tawh a, a la chak fai vek. Nimin khan Indian Wells second round-ah Sebastian Korda chu 6-2, 1-6, 7-6 (7-3) a hnehin third round a lut.

Grand Slam vawi 21 champion tawh Nadal hian Dan Evans a hmachhawn leh dawn. British player Evans tan tun dinhmunah chuan Nadal hmaa din hi thil châkawm tak a ni kher lo ang. Evans hian inkhel dangah Federico Coria chu 6-2, 6-0 in a lo hneh ve thung.

Kum 35 mi Nadal-a'n kuminah tournament pali a khelhna a ni a, a hmasa pathumah a champion vek avangin tun ṭumah pawh hian rinkai a ni. Second round inkhelah pawh hian, set hnuhnung berah 5-2 in hniam zawk hman mah se ropui takin a tho chhuak.

Nadal chuan, "Tennis ka khelh chhan chu beidawng loa beih hi a ni. Keimah bakah ka chhungte hian beidawng turin min duh ngai lo, chu thil chu tun ṭumah pawh hian a takin a lang," tiin a sawi.

Season hmang ṭha viau mah se Nadal tan tournament zawng zawng erawh khelh vek theih a ni dawn lo. A kum a tam ve deuh tawh a, chawlh hahdam a mamawh. March 21 aṭanga khelh tur Miami Open aṭangin a inhnukdawk fel.

Miami Open-ah hian kum 2005, 2008, 2011, 2014 leh 2007 te khan final a lut vek a, mahse nomawi a la chawi ngai lo. A hlawhtlin hleihtheih lohna hmuna thahrui sen ai chuan, clay court season hmang tura hahdam kha atan a finthlak zawk.

Nimin inkhel dangah Daniil Medvedev chuan Tomas Machac 6-3, 6-2 in a hneh. Russian star hian world number 1 dinhmun hum chhunzawm turin quarterfinal tal a thlen a ngai, player ṭha Gael Monfils a hmachhawn leh ang.