Ballon d'Or khalphung an thlak

Football huanga mimal chawimawina ngaihhlut ber Ballon d'Or kalphung an ti danglam. Tunah chuan season khat chhung chu teh nan hman a ni dawn, tun hma chuan kum khat chhunga an chet dan hmangin an teh ṭhin.

January aṭanga December thleng an en ṭhin chu August aṭanga July a ni dawn tihna a ni a, kumin tawpa neih tur Qatar World Cup chu kum 2023 award tehna huanga a tel tur thu an sawi chiang nghal bawk.

France Football magazine chuan judge pawh an ti tlem. Mipa award atan judge 170 awm ṭhin chu 100 an ni tawh dawn a, hmeichhe lamah judge 50 an awm thung ang. Award hi mipa leh hmeichhe tan an siam ṭhin.

France Football editor Pascal Ferre chuan, "A hma aiin thil a felfai zual tura ngaih a ni, thil thar danglam ṭha tak thlen theihna remchang a ni ngei ang," tiin a sawi a, a hma aia ṭha zawk a nih ngei a beisei.

Kum 2021 Ballon d'Or kha Lionel Messi khutah hlan a ni a, Argentina captain hian vawi sarih dawng tawhin ani aia dawng hnem an awm lo. Bayern Munich striker Robert Lewandowski-a'n season a hman ṭhat avangin award hian sawisel a hlawh.

Lewandowski-a'n 2020-21 season khan Bundesliga-ah goal 41 ngawt a khung a, award ngaihhlut hlawhah erawh pahnihna a ni. Chutih rualin Messi hian an ram chu Copa Amercia-ah a champion pui a, mimal chawimawina langsar a hui vek thung.

Ruahman dan chuan kumin September emaw October thlaah emaw Ballon d'Or hi sem leh a ni dawn.