A chung berah AC Milan
AC Milan tan Serie A nomawi beiseina a sang zel. Stefano Pioli naute hian Inrinni zan khan Empoli 1-0 in an hneh a, point 63 hmuin anmahni hnaih bertu Inter Milan lakah point ngain an sang fal ta.
Mahse, champion lai Inter hian match hnihin an khel tlem zawk. An khelh hmabak pahnihah an chak a nih chuan a chung berah an la awm leh thei dawn, nomawi inchuh boruak a sang chhunzawm zel ang.
Goal khat a tawk
Hmanni lawka goal pawimawh khungtu Olivier Giroud hoin Milan lamin bul an ṭan. France international hian remchang pawh a hmu, mahse a vanneih zan a ni tlat lo. Franck Kessie khung tur pawh ṭha takin an dansak bawk.
Minute 19-naah goal awmchhun kan hmu, goal khung zen zen lo defender Pierre Kalulu chuan hla deuh tak aṭangin mawi zetin a khung a, senior career-a goal hnih a khungna chiah a ni - Milan tan a hlutna erawh a sang hle thung.
Mikhual Empoli tan Sebastiano Luperto-a'n a tauh goal teuh viau, mahse keeper Mike Maignan-a'n a lo dansak. Bench aṭanga lut Zlatan Ibrahimovic-a'n boruak a siam a, goal erawh a la keng tel lo thung. Match lehpekah chuan bul a ṭan theih tawh a rinawm.
Hmalam thlir in
Hma hruaitu ni mah se an dinhmun a nghet lo tih a chiang. AC Milan manager Stefano Pioli a la ṭawng fimkhur hle. Pioli chuan, "Kan match khelh leh tur hi a pawimawh ber anga kan ngaih zel a ngai, a indawt te te in kan ngaihtuah tur a ni ang.
"Table chung berah kan awm a ni mai thei, amaherawhchu kan elpui dangten match an khel tlem tih kan hriat a ngai," a ti a, champion lai leh pahnihna Inter Milan chauh ni loin, pathumna Napoli leh palina Juventus thlengin an elpui an nih thu a sawi bawk.
Milan hian Serie A nomawi vawi 18 an chawi tawh a, an champion hnuhnung ber erawh kum 2010-11 season daih tawh kha a ni. A hnuah season kua ngawt a zawnin Juve an champion a, nikum khan Inter hun a inherchhuak - kuminah Milan tan beiseina a sang.
Juve an chak
Alvaro Morata-a goal hnih hmangin Juventus chuan Sampdoria 3-1 in an luh chhuah a, goal pakhat hi Maya Yoshida-a'n anmahni lama a tih luh a ni. Mualneitu an vanduai, own goal an neih bakah Antonio Candreva chuan penalty a hlah; Abdelhamid Sabiri hmanga an goal neih a tawk si lo.
Old Lady hian season bul an ṭan chhe hle a, an tan palina nih phak pawh harsa hle tura ngaih a ni hman. Mahse, thlasik bazar an hmang fuh a, harhtharna changin hma an sawn chak hle - tunah chuan palina chauh ni loin nomawi pawh an sawi ngam leh ta.
Khelh zat inangah Juve hian hmahruaitu Milan an phak lohna chu point ruk chauh a ni. Match khelh hmabak pakua ve ve an la nei a, thil a la danglam duai thei. Chutih rualin Massimiliano Allegri naute hi midang result-a innghat an ni tel tawh.
Allegri a lawm
Juventus manager Max Allegri chuan, "Technical zawnga kan thlir chuan Alvaro hi Europe-a striker ṭha berte zinga mi a ni. Chet fuh loh deuh chang chu nei bawk mah se, hmunruak a nei a nih phawt chuan a hlauhawm reng.
"Sampdoria hi team nem an ni ngai lo, an lak aṭanga result ṭha kan neih avangin player an khel ṭha tlang tihna a ni. Palina dinhmun hauh nghet turin kan mamawh ang point kan hmu, kan hmabaka Villarreal hmachhawn theih nan inbuatsaihna a ni bawk," a ti.
Turin club hian Champions League last 16 an lut a, first leg-ah Villarreal nen 1-1 in an inhnehtawk. Nilaini zan hian Allianz Stadium-ah Spanish club hi an lo mikhual ve thung dawn a, inhnehtawk a awm thei tawh lo ang.