Atletico an chak

Champions League khelh tum Atletico Madrid-in season thara European club football inelna sang ber khel turin kawng dik an zawh zel a, Zirtawpni zan khan an mikhual Cadiz chu 2-1 in an hneh.

La Liga table-ah 18-na ni mah se Cadiz hi an league match hnuhnung paliah an tlawm miah lo - vawi thum draw neiin, vawi khat an chak a, an tan chuan an 'form' ve lai tak a ni.

Mahse, Atletico-in an mikhual lakah hian ṭhat an lo chhuah duh lo a, Joao Felix chuan minute thumna lekah goal hmahruai a khung.

Cadiz tan tawnhriat nei ṭha Álvaro Negredo chuan a la tar lo tih pholangin, tun season-a a goal kuana chu minute 45-naah a khung a, si phurh a sut.

Mahse, Manchester City striker hlui goal khung hi Cadiz-in an hlimpui chhung a rei lo - Rodrigo de Paul chuan minute 68-naah Atletico tan a khung ve leh a, 2-1 in Madrid khaw club an chak.

Cadiz hian hun tawp lamah nawr viau mah se goal an khung thei lo a, Atletico rawlthar Javi Serrano chu minute 88-naah hnawhchhuah a ni chungin a tam zawk an nih pawh an chhawr hman chuang lo.

Atletico an chak avangin La Liga table-ah pathumna an ni a, nizana Osasuna mikhualtu Barcelona an chak chuan palinaah an tla thla leh thung ang - he thu buatsaih lai hian Barcelona result kan hre hman lo.

March 11, Zirtawpni Zan
Atletico Madrid 2 - 1 Cadiz
ATM: João Félix 3'; Rodrigo de Paul 68'
CAD: Álvaro Negredo 45'

March 12, Inrinni Zan
Levante 1 - 1 Espanyol
LEV: Dani Gómez 80'
ESP: Javi Puado 50'

Granada 0 - 1 Elche
ELC: Fidel Chaves 11'

Villarreal 1 - 0 Celta Vigo
VIL: Dani Parejo 64'

Getafe 0 - 0 Valencia

Zanin Inkhel Tur
Real Mallorca 1:30 AM Real Madrid