England rawlthar rual an hmuhnawm

England-in match pawimawhah Belgium an hneh loh avangin Nations League finals an khel thei dawn lo a, amaherawhchu Nilaini zan khan Iceland 4-0 a sawpin inelna ṭha takin an khar. 

Gareth Southgate-a'n Iceland hmachhawn turin player beiseiawm rual a chhawr a, first half-ah Declan Rice leh Mason Mount ten an khung. Second half-ah Phil Foden-a'n goal hnih a khung belh a, nuamsa takin Wembley Stadium-ah hnehna an chang.

Minute 20-naah Jack Grealish-a freekick hlawhchhuah chu Phil Foden-a'n petin West Ham midfielder Rice-a'n a tauh lut. Minute li hnuah Bukayo Saka leh Iceland defender tihsual zarah Mason Mount-a'n a pet goal.

Iceland player Birkir Mar Saevarsson chu minute 54-naah hnawhchhuah a ni a, England-in beisei tur nei tawh lo team lakah harsatna an tawk lo.

Man City midfielder Foden a hmuhnawm a, Iceland tlarhnung tan a hnawksak hle. Iceland an tawn hmachhawn ṭuma hotel-a nula koh avanga mualpho Foden hian hun tawp lamah a phu angin a pet goal.

Minute 80-naah Jadon Sancho pass chu Foden hian ṭha zet a goal kilah a pet lut a, minute li hnuah box pawn aṭangin kawh zetin a pet goal leh bawk.

England midfielder pali Rice, Mount, Foden leh Grealish te an hmuhnawm. Aston Villa captain Grealish a hmuhnawm tluang zel a, mual chhunga che ṭha ber erawh Foden a ni thung. 

Chutihrualin Arsenal rawlthar Saka sawi hmaih a thiang lo a, mual ding lam sir aṭangin a nawr na hle. Gareth Southgate-a'n Belgium laka a hman loh Harry Maguire bul ṭan tirin Manchester United captain hoa khel England tlarhnung pawh an khawng ṭha hle.

Amaherawhchu England leh Iceland inkhel result hian nghawng a nei lo a, pressure nei loa khel an nih avangin talent ṭha sa Southgate-a naute an theihna angin an khek chhuak. A tak ramah erawh Three Lions-in finals an thleng zo lo a, Belgium leh Denmark hnuaiah an awm.