Lukaku-a'n Belgium finals a thlenpui

Nations League finals thleng turin Belgium-in Nilaini zan khan Denmark 4-2 in an hneh. Inter Milan striker Romelu Lukaku chuan Belgium tan goal hnih a khung.

Leicester midfielder Youri Tielemans hmangin minute thumna lekah Belgium-in hma an hruai. Denmark hian Jonas Wind hmangin siphurh an sut a, Martin Braithwaite-a'n hmahruaina theihna hun ṭha a bawhpelh. 

Lukaku-a'n second half-ah goal hnih a khung avangin Denmark finals luhna kawng inhawng chu kharsak leh nghal an ni. Nacer Chadli-a'n minute 86-naah an lamah a tihluh avangin Denmark an phur hman a, amaherawhchu minute khat hnuah Kevin De Bruyne-a'n Belgium chak ngemnghehna goal a khung.

Goal hnih khungtu Lukaku chuan, "Chak hram ṭum a awm a, chu chu tun ṭuma kan chak dan hi a ni. Finals khel turin point khat kan mamawh tih kan hria a, mahse risk kan la duh lo," tiin attacking game an khelh chhan a sawi.

Kum 27 mi Lukaku hian Belgium tana match hnuhnung 14-ah goal 17 a khung a, Inter Milan striker hian goal khung thei bik player a nihzia a takin a lantir. Belgium hian nakkum October thlaah France, Spain leh Italy te nen finals an khel ang.