Mizoram Online Open Chess inelnaah Robert Runremmawia pakhatna

Mizoram Chess Association-in November 7 khan state level online chess inelna hmasa ber an buatsaih a, November 18 khan result an puang. Lunglei mi Robert Run-remmawia chu pakhatna a ni a, Saingura Sailo (Chanmari) leh James Lalsangzuala (Tuivamit) ten an dawt.

Online inelnaah hian hming pe lut 206 an awm a, internet connection leh harsatna dang avanga tel thei lo mi 10 awmin player 196-in inelna hi an hmachhawn. 

MCA hnuaia District Chess Association 11 an tel a; District hrang hrang Aizawl (113), Lunglei (20), Champhai (11), Serchhip (11), Siaha (10), Mamit (10), Lawngtlai (9), Kolasib (6), Saitual (4) leh Khawzawl (2) aṭangin inelnaah hian an tel.

Point hmu sang 30 leh special prize mi pathum hnenah lawmman atan Trophy leh Certificate bakah pawisa fai Rs 23,700 an sem ral. Mission Veng naupang kum 5 leh thla 2 mi John Lalrinfela chu player naupang ber a ni.

Thenzawl aṭanga tel Thangchungnunga (Kum 64 leh thla 8) chu tel upa ber a ni. Hmeichhe tel zingah Venghlui nula Jacqueline Lalthlengliani ti ṭha berin point li a hmu a, a pumpuiah 105-na a ni pha a ni.