Mizoram Premier League Season 7 semifinal khel tur a hriat kim ta
Zirtawpni zan khan Electric Vengin Mizoram Premier League Season 7 semifinal luh inchuhna inkhelah Mizoram Police an hneh lo a, Chanmari leh Aizawl FC inkhel an nghah a ṭul. Inrinni zanah chak mamawh Chawngthansanga hoten I League club lakah goal an khung lawk lo a, minute 85-naah Laldampuia'n goal ropui khungin Chanmari FC an chak. Hlauthawng reng renga awm Chanmari an hlim a, beiseina sang tak nei Electric Veng beiseina erawh hmeh thim a ni thung.
Chanmari FC-in MPL-a an record duhawm tak chhawm nung zelin knockout stage lut thei ziah awm chhun an ni a, semifinal-ah league hmahruaitu Chhinga Veng nen an inhmachhawn ang.
Mizoram Police-in Chanmarians point hmuh zat point 21 chiah hmu mah se head to head-ah an ṭhat zawk avangin pathumna an ni a, pahnihna Aizawl FC nen final khel tur an zawng dawn.
CFC damna Dampuia
Aizawl FC-in kar liam ta khan match thum an nei a, tun karah MPL champion lai Chhinga Veng leh East Bengal te an hmachhawn dawn avangin Chanmari FC nen pawh hian nasa lehzuala an squad siksawi a ngai a, he inkhel result-a innghat Electric Veng tan hriat nuam a ni lo.
Chanmari FC-in point thum an mamawhna hre chungin an khel a, inkhel an thunun. Amaherawhchu goal hmaah an vanduai a, AFC defender Lalhriatrenga (Achi-a) chu box chhungah handball mah se penalty pek a ni lo a, MC Malsawmzuala goal hmaah a vannei lo.
Second half-ah Chanmari FC-in goal an nawr chhunzawm a, MC-a freekick keeper Gurpreet-a tih per chu Lalmuanzova'n goal-ah a chantir thei lo.
Chanmari an hlauthawng a, mahse minute 85-naah Bethlehem Vengthlang FC laka chhandamtu Dampuia bawk a rawn lang nawn. Kawrtethawveng tlangval hian yard 25 bawr velah ball changin a petna tur khawp hmun ruak a insiam a, goal kilah petin keeper Gurpreet-a'n a dang thei lo. Dampuia'n match zawnin chakna goal a khung a, Chanmari a chhanhim.
Shaabaash Chanmari
Chanmari FC-in inkhel pawimawhah chuan ṭantu an nei leh ta a, an hla thul khung 'Shaabaash' sa rual tham an pung khawm. Ṭantu ṭha nei lo se Aizawl FC lakah hnehna an chan theih a rinawm lo a, semifinal an thlen theih chhan hi mipui tih loh theih loh a ni a, final thlen an duh chuan mipui tam zawk an thawhchhuah a ṭul ang.
CFC coach Chawngthansanga chuan, "Semifinal kan thlen theih chhan hi kan thawhrimna leh mipui bakah kan vanneih vang a ni a, inchhuang thei kan awm lo. Kan lawm takzet zet a ni," tiin Vanglaini a hrilh. Chawnga chenna Tanhril mipui engemaw zatin an veng tlangval ṭan tur hian Lammual an pan ve bawk a, Chanmari FC-in huang an zauh tiin a sawi theih bawk.
Chawnga hian MPL club hrang hrang Reitlang (Zo United), Chanmari West, Bethlehem Vengthlang leh Chhinga Veng te a enkawl tawh a, tun hi knockout stage a luh vawi khatna niin semifinal-ah a club hlui Chhingcows a hmachhawn ang.
Champion lai Chhinga Veng hian season liam ta khan semifinal-ah Chanmari hi an hneh tawh a ni.
Hun pawimawh Mizoram Police an danglam
Zirtawpni zan Lammual inkhel pawimawh takah Mizoram Police-in MPL7 semifinal khel tura an elpui Electric Veng FC chu 2-1 a hnehin knockout stage an lut.
Police tan man of the match-a thlan R. Malsawmtluanga chuan minute 13-naah freekick aṭangin mawi takin a khung a, Electric Vengin minute 50-naah H. Lalfakzuala hmangin an sut. Lalbiaksanga Colney-in chak an mamawh tih hriain Malsawmfela a luhtir a, Ramhlun South tlangval hian Electric Veng tlarhnung a tibuai pha a, an chakna tak erawh Lalrinzuala Khiangte cross ṭha tak Fakzuala tauh luh a ni.
Football nunrawng
Electric Vengin MPL an khelh hmasak berah round 1 aṭangin a sang paliah an awm char char a, round thum lai chu pakhatna dinhmun an awm hial a, round 14-naah chiah a sang paliah an awm lo. Serchhip-a round 7 khelh zawhah EFC hian point 16 an hmu tawh a, amaherawhchu round hnuhnung pasarih aṭangin point li chauh an hlawh chhuak. Police nena an inkhelh ṭum hian Electric Veng mipui tam takin Lammualah an
ṭawiawm a, khelmual chhung leh pawna an thawhrim danah semifinal thlen phu mah se an chungah vanduainain thla a zar a, semifinal thleng tawha an ngaih hnuah an tum ram hi an thleng zo lo.
MPL7 hmahruaitu Chhinga Veng
MPL champion lai Chhinga Veng chuan MPL7 league round hmahruaitu ni turin Inrinni zan khan Bethlehem Vengthlang 4-0 in an hneh. Chhingcows tan hian MS Dawngliana chuan hattrick a siam a, Hmingthanmawia'n goal khat a khung ve bawk. Shalom Lala chu a club hlui a hmachhawn ṭum hian minute 79-naah hnawhchhuah a ni a, BVT-in player 10 in an khel tluan.
Zanin dar 7:00 hian Chhinga Veng hian MPL league round khar nan Aizawl FC an hmachhawn ang. Zanina inkhel tur hi Aizawl FC-in I League an khelh avanga sawn kha a ni a, Gift Raikhan hote hian hnehna chang pawh ni se Lalsangzuala Hmar hote hi an umpha thei tawh lo.