MSL All Star Game a hlawhtling Champion lai hmachhawn tur Vikings

Mizoram Super League season 5 league round bik chu Zirtawpni zan khan khelh zawh a ni a, Inrinni zan khan hlawhtling takin All Star game neih zui a ni bawk - 22 November, Ningani zan aṭangin semifinal khelh chhunzawm tur a ni ang.

Hawla Indoor Stadium, Republic Vengthlanga All Star Game khelhah, Zarkawt club pahnih BCA leh Serpents bakah Tuikual South te awmna North chuan Khatla TBL, Mission Veng Vikings leh BC Bethlehem te awmna South chu 153-150 in an hneh; BCA star Lalrina Renthlei chu Most Valuable Player atana thlan a ni.

State pawn aṭanga chah luh player ṭha tak tak pali - Sowkin Shetty (BCA), Desmond Antwine Medder (TKS), Shashank Rai (TKS) leh Dijon Najee Farr (Vikings) ten Dunk Contest an nei a, Mission Veng Vikings duhlai Najee Farr chu pakhatna a ni. 3-Points Shootout huangah Lalruatkima (Zarkawt Serpents) chu pakhatna a ni bawk.

A ṭha pali chu
League round hnuhnung berah vawi hnih champion tawh Khatla TBL chuan Zarkawt Serpents lakah 87-80 in hnehna an chang a, table-ah pahnihna niin November 23, Zirtawpni hian semifinal-a an match hmasa ber atan Tuikual South an hmachhawn ang.

Mission Veng Vikings an hneh loh hnuah Zarkawt BCA an thochhuak lehnghal, champion lai hian Tuikual South chu 89-82 in an hneh a, table-a palina Vikings nen November 22, Ningani zanah semifinal an khel dawn a ni. Semifinal lut phak lo pahnih BC Bethlehem leh Serpents ten season thara MSL khel chhunzawm tur zawk zawn nan relegation playoff an khel thung dawn a ni.