Kim loin India chak lo

India chuan Inrinni zan khan Jordan nen international friendly match an khel a, regular player tam zawk awm lo chunga khel Blue Tigers hi 2-1 in an tlawm.

Sunil Chhetri awm loh hlana captain armband hrengtu, India goalkeeper Gurpreet Singh Sandhu chuan inkhel

ṭantir lamah penalty dang mah se a tihsual avangin Jordan chu hmahruaina goal a khung tir a, goalkeeper Amer Shafi-a'n goal aṭanga a petchhuah chu chhut sualin India lamah a lut!

Jordan tan Ihsan Haddad chuan minutes 59-naah goal hnihna a khung zui a, India tan Nishu Kumar chuan bench aṭanga a luh hnuah sut ṭhen mah se goal dang erawh a lut zui tawh lo.

Inrinni zan inkhelah hian ruahsurin Indian player-te chuannna thlawhtheihna pakhat zawk a tih khawtlai avangin Jeje Lalpekhlua chu inlan thei lo zingah a tel a, Jerry Lalrinzuala chu wing-ah chhawr niin midfielder Anirudh Thapa chu striker atan hman a ni.

Jeje te chuanna hian Kuwait aṭangin Jordan an pan a, Kuwait an thlenin ruah a sur nasat avangin darkar 32 zet airport-ah an tang a, inkhelh hma zanin Jordan an thleng ve hram!

Hetihlai hian Jerry te chuanna erawh Qatar lam aṭangin an kal thung a, a hunah tak an thleng. Mahse, Jeje-te chuannaah hian striker zawng zawng an chuang vek a, India hian striker pawh an neih loh phah.

Jeje chuan, "A hma zana kan thlen ve chauh avangin team doctor-ten keini ho kha chu inkhel lo mai turin min ti a, min risk ngam lo a ni. Kan thawmhnaw dahna bag phei chu inkhelh hma khan kan dawng ve chauh," tiin Vanglaini a hrilh.