Djokovic ngam loh Medvedev

Novak Djokovic chu Daniil Medvedev lakah a chak lo a, world number 1 hi chak lo mah se ATP Finals khelh laiah semifinal lut turin beiseina a la nei. Russian star Medvedev erawh group match khelh hmabak pakhat nei chungin semifinal a lut chiang tawh.

Nilaini zan Group Tokyo 1970 ho inkhelah Djokovic a che fuh lo, vawi 24 ngawt unforced errors a neih bakah double faults ṭum nga a nei bawk - a tih sual avangin point a hloh hnem hle. Seeded palina Medvedev lakah 6-3, 6-3 in a chak lo.

Zanin dar 7:30 hian Djokovic leh Alexander Zverev ten an group match hnuhnung ber an khel dawn, a chak zawkin Medvedev hnung zuiin semifinal an lut ang. An group aṭang hian chak la nei lo Diego Schwartzman chu a tla chiang tawh thung.

O2 Arena, London khawpuia inkhel dangah seeded pangana Zverev-a'n a beiseina chhem nung turin Schwartzman chu 6-3, 4-6, 6-3 in a lo hneh ve thung a, German tlangval hian a match hmasa zawkah Medvedev a ngam lo mah se semifinal chu a kuta innghat a ni.

Djokovic-a'n a vawi ruk nan ATP Finals title lak a tum a, bul pawh a ṭan fuh. Match hmasa zawkah Schwartzman a sawp, match hnihnaah erawh beisei a phak lo hle - season kal laia a vawi li nan a tlawm.

Kum 33 mi Djokovic chuan, "Khawvela player ṭha ber ber i hmachhawn a nih chuan tih sual neih tam loh a ngai, hetianga ka khel zui a nih chuan a ṭha lo hle ang, a rang thei ang bera insiamṭhat nghal a ngai ang," a ti.

Medvedev-a'n vawi 12 chauh unforced errors a nei a, game hnuhnung 13 zinga 10 ngawt a lak theih bawk avangin a chungnung hle. Russian tlangval hian a khingpui chu a khelh ṭhat ber ni a loh thu a sawi ve bawk.