Zverev lakah Federer a tlawm

Roger Federer chuan tennis a khelh hun chhunga a nomawi 100-na chawi tur chuan season thar a nghah a ngai dawn ta. Inrinni zan khan Alexander Zverev a hneh loh avangin Federer hi ATP Finals khelh laiah semifinal paltlang zo loin a tla.

O2 Arena, London-a inelna neihah kum 21 mi Zverev chuan tennis huang chhunga palian a nih zia lantir nan Grand Slam vawi 20 champion tawh Federer hi 7-5, 7-6 (7-5) in a hneh a, nizan khan Novak Djokovic nen final an khel zui a, he thu buatsaih lai hian result kan hre hman lo.

Semifinal inkhel leh-lamah Serbian tlangval Djokovic hian South African star Kevin Anderson chu 6-2, 6-2 in a lo hneh ve thung a. World number 1 Djokovic hian nomawi a chawi emaw chawi lo pawh ni se a chung bera awm chungin season a khar dawn.

German rawlthar Zve-rev-a'n inkhel inhneh-tawk takah hnehna a chang a, chutih rualin a chet dan mawi lo vangin dem a hlawh. Set khatna 7-5 in a la a, set hnihna tie break an khelh laiin 6-6 (4-3) in a hnufual zawk. Federer-a'n backhand ṭha taka a pek phei chu vaw let mah se, Swiss star hnunga ball boy pakhatin tennis ball a thlauh chu sawiselin - he mi point bik hi an vuak ṭhat phah.

Point hmu zawkah ṭang mah se court chhunga inkhel entu lamin Zverev chetdan an lâwm lo a, dinhmun hnuai zawkah a din lai pawha 'cool' thei tak Federer ṭantute chuan Zverev hi an au el nasa hle.

World number 5 Zverev chuan, "Court chhungah khan Federer lakah ngaihdam ka dil nghal a, thil thleng pangngai a nih thu min hrilh. Tennis dan ang thlapin thil a kal a ni. Hetiang thil a thleng hi pawi ka ti a, mipui beisei loh thil thlentir kha ka duh dan a ni bik lo," tiin a sawi.