France hnehtu Dutch-in Germany an pet chhuak

Netherlands chuan tun hnaia match 15 chhung chak loh nei loa kaltluang France chu 2-0 in an hneh a, Dutch team an chak avang hian UEFA Nations League khelh laia Group A team pathum awm zinga a mawngphah luahtu Germany tan round sang zawk luh theihna kawng a ping nghal bawk.

Inrinni zan De Kuip Sta­dium-a inkhelah Liverpool midfielder Georginio Wijnal­dum chuan hnai tak aṭangin goal hmahruai a khung, France keeper Hugo Lloris-a'n Ryan Babel shot chu dang per mah se, ball per dawngtu Wijnaldum pet nawn a dang hman tawh lo.

Mualneitu Netherlands lamin inkhel an thunun a, France keeper Lloris a rim malh malh hle. Hun tawp dawnah Manchester United forward hlui Memphis Depay chuan penalty aṭangin an chak nemnghehna a khung bawk.

Netherlands hian zanin dar 1:15 hian Germany an hmachhawn leh nghal dawn a, point khat chauh pawh an hmuh belh a nih chuan Ronald Koeman-a naute hi group hmahruaitu an ni chiang ang - Group hmahruaitu hian nakkum June thla hian Nations League round sang zawk an khelh chhunzawm dawn a ni.

World champion France tan hmahruaitu ni turin Rotterdam-ah point khat bak hmuh belh a ngai lo a, mahse an tlawm avangin an kutah an hma hun a awm tawh lo. Germany-in Dutch team an hneh a nih chuan an tlang thung ang.

Hmalam panin

Tun hnai ram leh ram inelna lian pahnih Euro leh World Cup-ah Netherlands an inlan phak lo a, football thiam ram tia hriat lar ṭhin tan chanchin ṭha lo tak a ni. Harhtharna an chang chho mek a, manager Ronald Koeman chuan kawng dik an zawh thu a sawi.

Dutch coach Koeman chuan, "Inkhel boruak sang tak­a kan khelh dan hian min ti lawm. France hneh tur chuan minute 90 chhung tihsual nei loa khelh a ngai a, kan khingpui rawn inrem dan khan min barakhaih hle nachungin chak turin kan khel ṭha tawk a ni.

"A tir aṭanga a tawp thlengin kan khel ṭha a, he hnehna hian kan theihna san zia a lantir chiang hle. France hneh thei team kan din a nih chuan hmabak eng tak kan nei tihna a ni a, chhawmnun zel pawh kan tum ang," tiin a sawi.

Inkhel dang

Nations League inkhel dangah Gibraltar tan Group D4 aṭanga tlang turin beiseina a thamral teuh tawh hle, Armenia lakah Gibraltar hi 6-2 in an tlawm. Macedonia chuan 2-0 a Liechstenstein hnehin a chung berah an awm chhunzawm thung.

Wales pawh Denmark lakah 2-1 in an tlawm a, an tan round sang zawk luh beiseina a tawp rualin Republic of Ireland pawh an tla nghal bawk. Group B1 hmahruaitu ni chiang tawh Ukraine pawh Slovakia lakah 4-1 in an tlawm.