Champhai DFA Tourney November 20 aṭangin CDFA Cup

Champhai District Football Association hnuaia I Division club paruk inelna tur CDFA Cup 2018 chu November 20, Thawhlehni aṭang hian Chhangphut Field-ah khelh ṭan a ni dawn. Champion team hian MFA Cup-ah Champhai DFA ai an awh dawn a ni.

Inelnaah hian lawmman atan Rs 1,50,000 sem ral a ni dawn a, pakhatna aṭanga pathumna bakah, match tinah lawmman a awm zel ang. I Division club paruk - Venglai FC, FC Veng­thlang North, Vengsang FC, Kanan FC, Bethel FC leh Zo­tlang FC te chu legaue round-a an inkhelh kual vek hnuah a sang paliin semifinal an khel ang.

Champhaiah tho hian Mizo­ram Football Association, 8one Foundation leh Champhai DFA hmalakna kal zelah Inrinni aṭang khan Young Legends League (Baby League) neih chhunzawm a ni.

Baby League-ah hian team 12 an tel dawn a, team khat zel hian age category pathum, U-8, U-11 leh U-13 te an nei zel. Vengsang, Kahrawt leh Vengthlang aṭangin team pahnih, Venglai aṭangin team pathum bakah Kanan, Zo­tlang leh Ruantlang aṭang tein team khat ṭheuh an tel.

Naupang ten football huang­a hma an sawn theih nana buat­saih­ah hian a bul tumtu 8one Foundation chuan a bul ṭanni hian naupang 360 te hnenah a mal te tein jersey leh kekawrbul an semchhuak nghak vek a ni.