Hriatthiam har nih duh Klopp

Liverpool manager Jurgen Klopp chuan nimin khan media mite a hmachhawn a, top flight football-a point hmu hnem ber nih theih a inrin leh rin loh zawhna chu, "He thu zawt tur hian tuin nge ti che?" tiin journalist a chhang!

Klopp chuan, "Record siam lam kan ngaihtuah lo a, chutiang zawngin ngaihtuahna seng ni ta ila match heti zozai hi kan chak thei lo ang," a ti a, record siam tum chu mahni pressure insiamna mai a nih thu a sawi. German coach huan sawi zawmin, "Spurs hian eng nge an tih dawn kan hre lo a, kan inzir lawk theihna chu Jose Mourinho kan lo hmachhawn tawhna kha a ni mai. 

"Kan khelh dan tur miin an hriatthiam lawk hi ka duh lo a, rin lawk dan min neih chuan team tan a ṭha lo a, min hmachhawn turin tumah hi an inpeih tur a ni lo," a ti a, Spurs hneh ngei a tum. Liverpool boss chuan James Milner leh Naby Keita chawlh hun chhung tur a hriat loh thu a sawi a, "Karleh thleng chu chiang takin an inlan thei lo ang," a ti a, Dejan Lovren leh Fabinho ten karlehah training an zawm tur thu a sawi thung.