Thomas Partey Hoin Arsenal An Party

Arsenal boruak a kang sang mek zel. Champions League an sawi ri ngam ta - Mikel Arteta naute tan UCL ticket chu an kuta awm a ni a, an hum hlen thei ang em tih chu hunin a la hril dawn, rei nghah erawh a ngai dawn tawh lo, kan hre thuai dawn.

North London club hian Pathianni zan khan an mikhual Leicester City 2-0 in an hneh, goal pahnih hi Thomas Partey leh Alexandre Lacazette te khung niin, mikhual Foxes lamin a chhanletna tur an nei ve lo.

Premier League table-ah Gunners hian Manchester United nek chhuakin palina dinhmun an luah, match thumin an khel tlem bawk. Man United nen hian season tawp hmain an la intawng dawn, palina inchuh boruak a la nung zel ang.

Inkhel dangah West Ham United chuan Aston Villa 2-1 in an hneh. David Moyes-a naute hian point 48 an hmu a, pangana United an phak lohna chu point hnih chauh a ni. Match khat lekah an dinhmun inthlak thei a la nih avangin UCL inchuh zingah an tel.

Laipui a puak
Emirates Stadium-a inkhelah ṭan phat aṭangin Arsenal an phur a, na takin an nawr nghal. Minute 11-naah Gabriel Martinelli-a corner pet chu Partey-a'n a tauh lut a, a hnu lawkah goal bar a pet per bawk - keeper Kasper Schmeichel a hawi hai hle.

Pound maktaduai 30 man Martin Odegaard-a'n inkhel cheimawi pahin a thunun tel nghal, nipui bazar laia Odegaard man let thawka tam an chhiar James Maddison chuan Norway captain chetla lai hi hnai takah a en; North London club an bazar sual lo.

Leicester City an awm mai mai bik lo. Harvey Barnes-a'n goalkeeper Aaron Ramsdale tan hna hautak zet vawi hnih a siamsak, ball kang a tauh a lo dansak phei chu pui tak a ni. Mual sir aṭanga entu Brendan Rodgers khan 'Wowww' a lo ti, Arsenal si ban nghak a hmuhnawm.

Beisei an neih lai takin defender Caglar Soyuncu-a'n handball vangin penalty a chawi, hun rei tak VAR hmanga an ennawn hnuah penalty hi pek niin, yellow card a chawi bawk. Penalty chhuihtu Lacazette tan khung turin harsatna a awm lo.

UCL rim a nam
Arsenal hian 1998-99 season aṭang khan a zawnin vawi 19 zet Champions Legue an khel. Mahse, Arsene Wenger hun hnuhnung berah an khel phak lo, French manager chhuah hnuah Champions League an khelh leh tawh loh avangin season nga chhung chu European football inelna sang ber an khel tawh lo.

Tun season-ah hun ṭha a inher chhuak a, league match khelh hmabak 11 an la neih zinga pakuaah an chak a nih chuan midang result ngaichang tel miah loin an tling dawn, hmabak erawh a awlsam dawn lo - Nilaini zanah Liverpool an mikhual dawn.

Gunners manager Arteta chuan, "UCL kan khel tur a ni, kan club sulhnu en let pawhin kan thil tih ṭhin a ni. Mahse, tunah hian chu hmun chu kan la thleng lo, hmabak paltlang tur tam tak kan la nei," tiin a ṭawng fimkhur hle.

Spanish manager chuan sawi zawmin, "Player ṭha tak tak kan nei a, an lakah beiseina pawh kan nei. An khelh ṭhat leh ṭhat loh chu result hi en mai tur a ni. Tun hnaiah ngelnghet taka result ṭha kan nei thei hian min tilawm," a ti.

Rodgers a lawm lo
Leicester City manager Rodgers chu penalty an chawi danah a lawm lo. Video Assistant Referee (VAR) thutlukna sawiselin Rodgers chuan, "Season kal laiah VAR kan hmang fo tawh a, mahse tun thleng chuan kan tana ṭha lo lam zelin thil a thleng.

"Soyuncu khan ball a khawih ngei, mahse mihring taksa chet dan hi thlir tel a ngai. Tih luih a ni lo a, milem angin a ban kha a la sawn thut thei lo, mihringin a duh reng vang ni loa a thunun theih loh thil thleng hi a awm," a ti.

Foxes hian beisei angin season an hmang ṭha lo, match 26 aṭanga point 33 hmuin 12-na dinhmun an luah - season thar atan European football an beisei ngam tawh lo, chhiarkawp dan erawh chuan kawng a la awm.

League-ah che ṭha lo mah se Europa Conference League-ah an che ṭha. Quarterfinal first leg-ah Rennes 2-0 in an hneh, tlang turin an dinhmun a ṭha tawk tawh hle. Ningani zanah Ligue 1 club hi an lenchilh ang.

Yarmolenko mittui
Minute 52-naah bench aṭangin Andriy Yarmolenko a rawn lut. Ukraine international hian fans lam aṭangin thlawpna a dawng ṭha, an ramin Russia laka harsatna a tawh lai a nih avangin lainattu a ngah, goal a la khung zui.

Goal luh hma a lut a ni a, a goal khung vangin Hammers hian 1-0 in hma an hruai. Kum 32 mi Yarmolenko-a'n a mittui a dang zo lo, khelmualah a ṭhingṭhi a, hun harsa tawk mek an ram mipuite a hre reng - Villa fans pawhin a goal hi an lawmpui hial asin!

Yarmolenko chuan, "Ka tan chuan a lawmawmin a lungchhiat thlak. Kan ram vangin thlawpna ṭha tak kan dawng, teammate bakah British mipui ten min ṭan tlat avangin ka lawm, a nihna takah chuan rilruah inkhelh a awm hlei thei lo.

"February 26 aṭang kha chuan rilru a hah zual a, training pawh ka nei pangngai thei lo. Ka chhungte leh mipui ka ngaihtuah a, rilru a ipik thei hle. Khelmual chhunga ka thlawpna tih lan theihna remchang ka nei hi ka lawm," a ti.