Mizo tlangvalin thiam a chang

Table Tennis a khelh thiam avanga hriat hlawh Lalrinpuia chuan court-ah thiam a chang. Taloja Jail, Mumbai-ah kum li, thla thum leh ni hnih hun a hman hnuin a ukil Tariq Sayyed chuan a chhuah theih tur thu a sawi chiang.

Kum 2017 December 12 khan Rinpuia leh a ṭhianpa chu Mozambique, Africa-ah an zin. Abu Dhabi aṭanga a haw chu Mumbai Airport-ah man a ni. An zin haw lam hi bum a tawk a, dan phal loh bungrua thawn haw a nih avangin an man, hun rei tak jail run thim a belh hnuah kawl a êng ve leh ta.

Rinpuia hi National Youth champion a ni tawh a, Mizo player zingah chuan thleng sang leh tawng sang ber a ni. Kum bithliah inelnaah India leh Mizoram tan medal tam tak a vaw chhuak tawh a, hmabak êng tak a neih laiin vanduaina hi a tawk.

Mizoram Table Tennis Association (MTTA) president C. Lalrinzuala chuan, "Hun rei tak tan ina a awm hnuah Rinpuia a lo chhuak thei ta hi MTTA chuan lawmawm a ti takzet. Ukil rawih theih nana pawisa thawhtute chungah lawmthu kan sawi takmeuh.

"Mizoram pawn leh chhunga awm Mizo ten kan ṭawngṭaipui nasa, harsatna a tawh lai pawha thlahthlam lotu tam tak an awm bawk, an chungah lawmthu kan sawi seng lo ang, kan lawm a ni," tiin Vanglaini a hrilh.

Rinpuia tan hian 'Rinpuia Puitu Group' siam a ni a, anni hian ukil rawih nan Rs 14,01, 237 zet an tuak chhuahsak. Sum thawhkhawm hi ukil rawih nana hman niin, a tawpah thudik a lan chhuah theih phah ta a ni.

Maubawk rawlthar Rinpuia hi 77th Junior and Youth National & Inter - State Table Tennis Championship-ah Mizoram tan a lo champion tawh a, sub junior, junior leh youth category-ah te India champion a ni vek tawh bawk.

India huapah chuan kum bithliah hrang hrangah a champion kim a, ranking-ah number 1 a ni vek bawk. Men's huangah bronze a la tawh a, Mizo zingah chuan a thlen chin thleng thei an la awm lo.