Chelsea an chak

United Kingdom sorkarin Roman Abramovich a hrem hnua a vawi khat nan Stamford Bridge-ah Chelsea an inlan a, an chak zo dawn lo emaw tih hnuah tun hnaia harhtharna chang Newcastle United chu 1-0 in an hneh.

Blues goal awmchhun hi minute 89-naa Kai Havertz-a khung a ni a, German attacking midfielder goal khung hi goal class sang bik a tling.

Magpies tan hun tawp dawna goal chhuah a na a, Havertz-a ber kherin a khung hi a na lehzual ang - Germany international hian first half-ah Magpies defender Dan Burn chu a kiuin a nghawk a, referee-in hnawt chhuak loin yellow card chiah a pe a ni.

Chelsea hian Nilaini zan dar 1:30-ah Champions League last 16 second leg match khel turin Lille an lenchilh zui dawn a, first leg-ah 2-0 a an chak tawh avangin tlang tura ngaih an ni.

Blues boss Thomas Tuchel chuan, "Thlawhtheihnaa France kan pan theih tur thu min hrilh a, kan thei ta lo a nih pawhin relin kan kal ang a, a la theih loh cheu chuan bus kan hmang ang a, chumi chu a la theih loh a nih pawhin mi pasarih chuan theihna motor ka khalh mai ang chu," a ti a, Lille hmachhawn a tum ruh hle.

Tuchel chuan club talbuai mah se, "Season tawp thleng ka cham dawn tih hi rinhlelh tur a awm lo," tiin chhuah a tum loh thu a sawi bawk.