Atletico hmaah Ronaldo leh Man United fiahna

UEFA Champions League last 16 second leg-ah Manchester United-in zanin dar 1:30 hian Atletico Madrid an mikhual dawn. Club ṭha pahnih hi first leg-ah 1-1 in an inhnehtawk a, Old Trafford-ah quarterfinal lut tur tihchian a ni ang.

Last 16 inkhel dangah Ajax-in Benfica an mikhual dawn a, first leg-ah 2-2 a an inhnehtawk avangin quarterfinal lut tur hriatthiam a la har. Zanin inkhel tur pahnih hi a hmuhnawm dawn.

A changtupa Ronaldo
Manchester United-in Atletico an hmachhawn hmain Tottenham Hotspur an hmachhawn a, Cristiano Ronaldo-a'n hattrick a siam. Portuguese forward hian goal thum a khung satliah lo a, hun pawimawh lai zela goal a khung avangin hattrick ropui bik a ni.

Ronaldo hian thawm ring tak a rawn nei a, Atletico laka a chet ṭhat zui loh chuan tuna amah faktu ṭhahnem takte hi amah seltuah an ṭang thei ang. Chuvangin Atletico an hmachhawn hunah en bik a hlawh dawn.

Portuguese forward hian Atletico lakah record ṭha tak a nei a, Atletico lakah goal 25 tehmeuh a khung tawh. Chung zingah chuan 2014 UCL final extra time-ah pawh khan Real Madrid kawr hain Atletico lamah hian goal pawimawh a khung.

Kim leh kim lo
Man United-in rawlthar duhawm Mason Greenwood la chhawr thei lo mah se Bruno Fernandes, Luke Shaw leh Scott McTominay te an dam tawh. Ralf Rangnick-a'n duh thlan tur player a nei dawn a, Ronaldo thlawp turin tun hnaiah Jadon Sancho a che ṭha bawk.

Tottenham hneh vangin Man United hi phur thar mah se tlarhnung a la phui lo. Captain Harry Maguire-a'n sawisel a hlawh a, England defender hi chetsual a ching.

Man United vanneihna erawh Atletico-in hrem vangin Yannick Carrasco an chhawr thei dawn lo a, hliam vangin Matheus Cunha, Daniel Wass, Sime Vrsaljko, Thomas Lemar, Mario Hermoso leh Geoffrey Kondogbia te an khel thei dawn lo.

Centre back Jose Gimenez pawh a dinhmun a chiang lo a, Atletico an kim dawn lo. Chutihrualin Atletico tana chanchin lawmawm chu Koke a dam tawh a, Spanish midfielder tawnhriat nei ṭha hi hun pawimawhah a ṭangkai ang.

Diego Simeone hian tlarhmaah Joao Felix, Antoine Griezmann leh Luis Suarez bakah Angel Correa te an la kawl a, Man United tlarhnung tan buaina tham an la tling.

Old Trafford-a khelh tur a nih bakah player dam ṭha ngah zawk Man United dinhmun a ṭha hret a, amaherawhchu Argentine manager hian rinkai lo zawk ni chunga chak dan a thiam tih hriat a ṭha.

UCL Last 16
First leg
February 15, Thawhlehni
Paris Saint-Germain 1–0 Real Madrid
PSG: Kylian Mbappe 90+4'
Sporting Lisbon 0–5 Manchester City
MAN: Riyad Mahrez 7'; Bernardo Silva 17', 44'; Phil Foden 32'; Raheem Sterling 58'
February 16, Nilaini
RB Salzburg 1–1 FC Bayern Munich
RBS : Chukwubuike Adamu 21'
FCB : Kingsley Coman 90'
Inter Milan 0–2 Liverpool
LFC : Roberto Firmino 75'; Mohamed Salah 83'
February 22, Thawhlehni zan
Chelsea 2–0 Lille
CHE: Kai Havertz 8'; Christian Pulisic 63'
Villarreal 1–1 Juventus
VIL: Dani Parejo 66'
JUV: Dusan Vlahovic 1'
February 23, Nilaini zan
Atletico Madrid 1–1 Manchester United
ATM : Joao Felix 7'
MNU : Anthony Elanga 80'
Benfica 2–2 Ajax
BEN : Sebastien Haller 26' (OG); Roman Yaremchuk 72'
AJX : Dusan Tadic 18'; Sebastien Haller 29'
Second Leg
March 8, Thawhlehni Zan
Bayern Munich 7–1 Red Bull Salzburg
BAY: Robert Lewandowski 12' (P), 21' (P), 23'; Serge Gnabry 31'; Thomas Müller 54', 83'; Leroy Sané 85'
RBS: Maurits Kjærgaard 70'
Agg-ah Bayern 8-2 in an chak
Liverpool 0–1 Inter Milan
INT: Lautaro Martínez 61'
Agg-ah Liverpool 2-1 in an chak
March 8, Nilaini zan
Real Madrid 3–1 PSG
RMA : Karim Benzema 61', 76', 78'
PSG : Kylian Mbappe 39'
Agg-ah Real Madrid 3-2 in an chak
Manchester City 0–0 Sporting Lisbon
Agg-ah Manchester City 5-0 in an chak
Zanin Inkhel tur
Manchester United 01:30 AM Atletico Madrid
Ajax 01:30 AM Benfica
March 16, Nilaini zan
Juventus 01:30 AM Villarreal
Lille 01:30 AM Chelsea
*UCL-ah away goal rule a awm tawh lo.
*Second leg hi March thlaah khelh a ni ang.
*Quarterfinal a?angin draw neih ?hat leh tur a ni a, tute pawh an inhmachhawn thei ang.