Men of Steel an 'comeback' thei dawn em?

Indian Super League semifinal thawhkhatna khelh zawh a ni tawh a, zanin dar 7:30 hian second leg-ah Jamshedpur FC leh Kerala Blasters an inkhel leh dawn - a hmuhnawm dawn tih inhrilh nawn a ngai lo.

Kerala Blasters hian first leg-ah 1-0 in hnehna an lo chang tawh a, an goal khung hi an hum theih chuan final an lut dawn tihna a ni a, mahse, league round-a goal khung hnem ber Jamshedpur-in goal khung loh an duh lo ang.

Blasters midfielder K. Lalṭhathanga'n, "First half ang chauh a la ni," tiin chetsual theih a nih thu Vanglaini a lo hrilh tawh a, Jamshedpur defender Ricky Lallawmawma'n, "Comeback theih kan beisei," tiin a sawi bawk.

Hliam tamna
League round an khelh dan aṭanga teh chuan Jamshedpur aia ṭha an awm lo - mahse, semifinal khelh dawnah player inhliam an nei nual a, inhliam zingah Mizo defender Laldinliana Renthlei a tel.

Armed Veng South tlangval hi a dar hliam a la dam chiang lo a, zaninah pawh a inlan thei dawn lo. Dinliana awm loh hlanin PC Laldinpuia'n a hmun ruak a lo luah tawh a, Samthang tlangval hi zaninah pawh a inlan leh ang.

Ricky chuan, "Hliam kan ngah deuh a, tunah pawh winger pangngai hi pakhat chiah kan nei a, a buaithlak khawp mai," tiin Vanglaini a hrilh a, chhuanlama hman erawh a tum lo.

Jamshedpur an ṭha
Men of Steel tan Greg Stewart-a'n tun season-ah goal 10 khungin assist vawi 10 a nei tawh a, JFC goal nawr bul inṭanna chu Rangers forward hlui hi a ni - mahse, first leg-ah Blasters tlarhnungin an dah ṭha hneh hle.

Jamshedpur tan 'comeback' turin Stewart khelh ṭhat a pawimawh a, Scottish forward hian a theihna ang taka a khel chhuak a nih phawt chuan Blasters tlarhnung tan manganna tham a tling ang.

Daniel Chima Chukwu-a'n first leg-ah a chance neih a khung ṭhin lo a, Nigerian striker tan innghahna tlak a nihzia pholan a hun leh tawh - tlarhnung erawh Peter Hartley hoin Eli Sabia, Dinpuia leh Ricky te an ding leh dawn a, an ngaihtuahawm lo ang.

Blasters thlirna
Semifinal first leg-a Blasters coach Ivan Vukomanovic-a tihfuh tak chu 4-4-2 formation a hmang kha a ni a, a bik takin Stewart an dah ṭha thei chu a tlarhnung ten fak an phuna a ni - centre back-a Ruivah Hormipam leh Marko Leskovic inkawp hi ISL-a defender inkawp fuh ber pawl an ni bawk.

Midfield-ah Puitea chu player pawimawh a ni leh dawn a, Bethlehem Vengthlang tlangval hi mual laiah roreltu ni turin an beisei leh dawn. Tlarhmaah Jorge Diaz leh Alvaro Vazquez inkawp hi hmachhawn an châkawm lo khawp ang.

Mual sir aṭanga goal nawr pui turin Adrian Luna leh Sahal Abdul Samad te an awm leh ang a, first leg-a goal awmchhun khungtu Sahal hian goal khung nawn leh sak a tum dawn. 1-0 in hma hruai mah ila, a la tawp lo. Ka ngaihdanah chuan tlang turin 50/50 chance kan la nei ve ve. Match hmasa bawk pawh a nihna takah chuan vanneih vanga chak kan ni a, first leg aiin a harsa zawk ang. Team boruak a ṭha a, final kan la sawi lo - second leg-a chak leh phawt hi kan duh chu a ni mai a, engkim hi Pathian kut a ni. Goa khaw lum zual hian inkhelh a tiharsa a, hei erawh Jamshedpur lam pawhin an tawrh ve tur tho a ni. Ka mimal career-a ka season duhawm ber anga chhal theih a ni a, final luh ngei chu a châkawm khawp mai. Kan veng mipui leh hmun hrang hranga min ṭawngṭaipui ṭhintu Mizo mipui chungah lawmthu ka sawi a ni.
- K. Lalṭhathanga (Puitea), Kerala Blasters

Kan hnufualna a tam lo a, tlang ngei turin beiseina sang tak chu kan la nei. A tawp thlen hram kan duh a, kan zawng zawngin kan bei dawn a, final luh kan duh a ni. Ka mimal career-ah pawh hun duhawm ber anga chhal theih a ni a, semifinal-a tawp mai chu ka tum lo. - Ricky Lallawmawma, Jamshedpur FC

Hliam avangin kan squad chu a pan deuh a, mahse, comeback theih erawh ka la beisei fan. Beiseina kan nei ve tlat a, final luh kan duh a ni. Engkim hi ka tan chuan thil thar zel a ni a, chona phurawm tak a ni zel mai. - PC Laldinpuia, Jamshedpur FC

ISL Semifinal
First Leg
March 11, Zirtawpni Zan
Jamshedpur 0 - 1 Kerala Blasters
KER: Sahal Abdul Samad 38'

March 12, Inrinni Zan
Hyderabad FC 3 - 1 ATK Mohun Bagan
HYD: Bartholomew Ogbeche 45+2'; Yasir Mohammad 58'; Javier Siverio 64'
AMB: Roy Krishna 18'

Second Leg
Zanin Inkhel Tur
Kerala Blasters 7:30 PM Jamshedpur FC

March 16, Nilaini Zan
ATK Mohun Bagan 7:30 PM Hyderabad FC

March 20, Pathianni Zan - Final

*Away goal rule hman a ni lo
*Inkhel pahnih belhkhawma goal khung tam zawkin final an lut ang.