Barcelona-in goal li an khung!

January transfer hnua Barcelona harhtharna chu a takin hmuh tur a awm zel a, Pathianni zan khan an mikhual Osasuna chu 4-0 ngawtin an sawp!

Catalan club tan Ferran Torres chuan goal hnih a khung a, Pierre-Emerick Aubameyang leh Riqui Puig ten goal khat ve ve an khung bawk - Osasuna lamin a chhanletna tur an nei thei lo.

Barcelona-in hnehna an chan avangin table-ah pathumna an ni leh ta a, palina Atletico Madrid nen an point hmuh zat a inang - Real Betis leh Real Sociedad an chak ve ve bawk a, Champions League khelh inchuh boruak a sang zel.

La Liga hmahruaitu Real Madrid chuan nizan khan Real Mallorca an lenchilh a, result kan hre hman lo - anmahni hnaih bertu Sevilla chu Rayo Vallecano nen 1-1 in an inhnehtawk a, Real tan lawmna an thlen.

Torres a tlangnel
Thlasik transfer-a Barcelona pantu Ferran Torres chu Nou Camp-ah a tlangnel chhunzawm zel a, goal hnih a khung - minute 14-naah goal hmasa zawk hi a khung a, rawlthar duhawm Gavi penalty hlawhchhuah chu a chhuih lut.

Kum 22 mi forward hian a duhtawk mai lo - minute 21-naah Ousmane Dembele through ball ṭha zet chu um lutin goal-ah a chantir a, Spanish forward hian innghahna tlak a nihzia a pholang.

Spain tan vawi 22 inlana goal 12 khung thei Torres hian season chawhma lam khan City tan inelna hrang hrangah match sarih chiah a khel hman a, goal thum a khung.

Pound maktaduai 46.3 a Barca a pan hnuah erawh match 12 khelin goal nga a khung ta a, assist vawi thum a nei bawk. Catalan club hian a khelh ṭhat dan a zirin Torres-a man hi pound maktaduai 8.4 an pek belh a la ngai a, hetiang renga a khelh chuan a zahve tal an pek belh ngei a la ngai ang.

Auba a hlim
Torres-a'n a goal hnihna a khung aṭanga minute rukna lekah Barca-in goal an khung belh a, a khungtu chu tudang ni loin Arsenal duh loh Pierre-Emerick Aubameyang a ni.

Gabon international hian Dembele siamsak bawk goal-ah a chantir a, Barca a pan hnuah league match ruk khelin goal nga a khung ta der a, kum 2001 hnua Barca tana league goal nga khung tura hun duh rei lo pathumna a ni - Samuel Eto'o (2004) leh Zlatan Ibrahimovic (2009) te chiah a tluk lo. Barca boss Xavi chuan, "Van lam thilpek a ni," tiin Auba hi a fak!

Barcelona goal thumna hi minute 75-naa Riqui Puig-a khung a ni a, kum 22 mi midfielder shot hi a tirah Osasuna keeper Sergio Herrera chuan dang mah se Puig hian la leh chatin Herrera hi a tlan hel a, defender pahnih ven karah a khung.

Osasuna hian a chhanletna tur an nei lo a, 4-0 in Barca an chak. Catalan club hian kumina league match an khelh pakuaah tlawm an la nei lo - vawi hnih draw an nei a, vawi sarih an chak thei.

Inkhel dang
Sevilla-in Real Madrid tibuai turin hnehna chan an mamawh tih an hria a, mahse, Rayo Vallecano khelmualah point khat bak an hlawh chhuak thei lo - pahnihna la ni tho mah se point sarih ngawtin hmahruaitu Real hi an phak tawh lo.

Nizana Real inkhel result a zirin an inthlauhna hi danglam leh thei a ni bawk - Rayo tan Bebe chuan goal hmahruai a khung zawk a, Sevilla hian Thomas Delaney hmangin an chhanglet.

Hetihlai hian Champions League khelh tum Real Betis leh Real Sociedad an chak ve ve a, Betis hian Borja Iglesias goal hmangin Athletic Bilbao chu 1-0 in an hneh - an player pawimawh Nabil Fekir chu minute 80-naa hnawhchhuah a nih avangin an lawm erawh a kim lo.

Sociedad chuan 1-0 in Deportivo Alaves an hneh bawk a, Martin Zubimendi chuan inkhela goal awmchhun a khung. Khelh zat inangah Sociedad hian point li bakin palina Atletico an thlau ta lo a, Betis hian point hnih lekin an thlau bawk.