Inter Milan tan point khat

Serie A champion lai Inter Milan chu Torino nen 1-1 in an inhnehtawk. Simone Inzaghi nauten point an hloh avangin nomawi humhim a harsa sawt dawn, an khelh hmabakah chak pawh ni se hmahruaitu AC Milan an phak thei tawh lo.

Pathianni zan inkhelah Gleison Bremer chuan minute 12-na lekah goal a khung, corner aṭanga ball kal Inter defender ten an tauh chhuah theih mai loh chu buai deuh nuaih aṭangin a khung a, match ruk chhung chak ni hmel hmu lo Torino beiseina a siamsak.

Torino keeper Etrit Berisha a che ṭha a, forward Lautaro Martinez, Hakan Calhanoglu leh Federico Dimarco te khung tur ṭha takin a dansak vek a, an mualah point thum hlu tak an hlawh chhuak teuh hle.

Hun tawp hma chiahin Alexis Sanchez-a'n box chhung aṭangin siphurh a sut a, goal dang lut zui loin point khat ve vein an insem. Inter hian point 59 neiin pathumna dinhmun an luah, an chungah Napoli leh Milan

an awm.

Inter manager Inzaghi chuan, "Scudetto humhim kan duh a nih chuan hmasawn kan ngai. Serie A khelh hmabak 10 kan la neih hi final vek a ni tawh, chu bakah chuan Coppa Italia kan ngaihtuah tel a ngai bawk," tiin a sawi.

Inkhel dangah Napoli chuan Victor Osimhen-a goal hnih hmangin Hellas Verona 2-1 in an hneh a, hmahruaitu Milan an thlahfal duh bik lo.

Jose Mourinho enkawl AS Roma erawhin hun tawp dawna Lorenzo Pellegrini-a penalty hmangin Udinese 1-1 in an inhnehtawkpui hram.