Serchhipah Pacers an champion

Tualchhung cricket inelna, tun hnaia Serchhipa a khelh zawk tak CK Frolics Cup-ah Pacers cricket club an champion, final-ah run 114-in Hmar Veng Cricket Club an hneh.

Pacers tan Lalawmpuia (65 runs) leh Lalhlimpuia (55) te an che ṭha a, ball 10 lek aṭanga run 32 siam Lalhriatpuia Khiangte che ṭha bawkin run 190 an siam. An bowler Alex Zosanglura chuan wicket nga la bawkin an khingpuiten run 76 bak an siam thei lo.

Alex Zosanglura hi final man of the match bakah best bowler leh man of the tournament chawimawina pek a ni a. Pacers tana a khelhpui Lalawmpuia'n best batsman chawimawina a dawng ve thung.

CK Frolics Cup hi knockout tournament niin team pariatin Khawtetlang field-ah an khel a, team pariat telin paruk hi Serchhip district chhunga mi an ni a, Aizawl aṭangin team pahnih an tel bawk.