Everton dihmun a ṭha lo, tla tur Norwich?

Premier League relegation battle a ngaihnawm chho hle. Everton-in Inrinni zan khan Wolverhampton Wanderers 1-0 in an hneh lo a, Frank Lampard-a hote hi 17-naah awm - an dinhmun a ṭha lo hle.

Leeds United-in manager thar Jesse Marsch hnuaiah table mawngphaha awm Norwich City an hneh hram a, point thum hlu bik an hlawh chhuak. Watford-in Southampton 2-1 in an hneh a, relegation zone-ah la awm mah se Toffees nen an point hmuh zat a inang tawh.

Lampard a fuh lo!
Goodsion Park-ah Everton-in Wolves an mikhual a, Lampard-a hoten first half khel ṭha mah se goal an khung lo. Minute 49-naah Reuben Neves-a cross chu Conor Coady-a'n a tauh goal a, inkhela goal awmchhun a ni.

Chelsea manager hlui Lampard-a hnuaiah Everton-in league match ruk an khel tawh a, vawi nga ngawt an chak lo. Toffees hi match hnuhnung paliah an chak lo vek bawk a, Wolves lakah hian Jonjoe Kenny chu second half-ah hnawhchhuah a ni bawk.

Everton hi match thumin la khel tlem mah se tun hnaia an result thlir chuan tla thei dinhmunah an ding tih zep rual a ni tawh lo. March 17, Ningani zan hian Newcastle United an mikhual dawn a, inkhel pawimawh a ni ang.

Everton manager Frank Lampard chuan, "Match khelh tur a la tam a, chuvangin kan rilru kan tih paukhauh a ṭul. Chak loh hi ngaiah kan nei tawh a, thlak danglam mai a har. Kan thawhho ṭhat chuan point hmuhna tur a la tam," tiin a sawi.

Beseina siamtu Hernandes
St Mary's-ah Cucho Hernandez a langsar ber a, Watford winger Hernandez hian goal hnih khungin mualneitu Southampton 2-1 in an hneh. Roy Hodgson hoten match li chhung chak hmel an hmuh loh hnuah point thum an hlawh chhuak a, Premier League khel zel turin beiseina thar an neih phah bawk.

Watford manager Roy Hodgson chuan, "Ṭan phat aṭangin kan khel ṭha. Kan khelh danah ka lungawi a, min ṭantute thawm pawh a ṭha. Kan muala inkhel ang mai kan ni a, point thum kan hmuh theih chhanhi player-te vanga ni," tiin a sawi.

Hornets hi an awl rih dawn a, international break a awm bawk avangin tun thla chhungin an inkhel tawh dawn lo. April 2 hian Liverpool hmachhawn turin Anfield an tlawh dawn a, inpuahchahna hun an nei ṭha hle.

Leeds an chak ta
Elland Road-ah Leeds United leh Norwich City inkhel boruak a sang a, hun tawp thlengin inkhel a hmuhnawm. Whites-in minute 14-na lekah Rodrigo hmangin hma an hruai a, minute 90-na thlengin goal a luh belh lo.

Amaherawhchu injury time-ah thil danglam a thleng. Nowrich City-in hun pek belh minute khatnaah Kenny McLean-a'n sipurh a sut a, Canaries-in point an hlawh chhuak turah a ngaih thaih. Mahse, Leeds United an beidawng lo a, minute thum hnuah kum 19 mi Joe Gelhardt-a'n chakna goal a khung.

Gelhardt-a'n goal a khung theih nan Raphinha a thawh hlawk. Leeds United-in hnehna an chan avangin Elland Road-a mipui thawm a ṭha hle. Whites manager Jesse Marsch chuan, "Elland Road boruak an sawi hi ka hre ve fo tawh a, a takin ka tawng ta e," tiin a sawi.

Leeds United hian March 18, Zirtawpni zanah Wolverhampton Wanderers hmachhawn turin Molineux Stadium an tlawh dawn a, Marsch hote hi chak zo hlim ni mah se dinhmun ṭhaa awm turin point an la mamawh hle.