MPL semifinal khelh hun a chiang

Nimin khan MPL Board chu Mizoram Premier League Season 7 semifinal bakah MPL Qualifier leh MPL Playoff chungchang ngaihtuahin an ṭhu khawm a, inelna hrang hrang neih hun tur an tichiang.

India prime minister Narendra Modi-a'n Aizawl a rawn tlawh dawn avangin MPL khelh hun sawn a ṭul a, MLA inthlanpui kum a nih avanga final khelh hun atana ruahman December 7 bawhpelh loh dan kawng zawn a ṭul avangin MPL7 first leg chu Inrinni leh Thawhṭanni zanah khelh a ni dawn.

November 24, Inrinni zanah champion lai Chhinga Veng FC leh Chanmari FC te an inkhel ang. November 26, Thawhṭanni zanah I League club Aizawl FC leh Mizoram Police te first leg-ah an inhmachhawn dawn bawk. AFC hian tun Inrinni hian I League-ah East Bengal an mikhual dawn a, hei vang hian an inkhelh hun hi karleh lama sawn hlat a ṭul phah a ni.

Second leg-ah Chhingcows leh Chanmarians bawk an inkhel hmasa dawn a, November 29 zanah final khel tur hmasa zawk a hriat dawn. Ground remchan loh avangin November 30-ah an khel dawn lo a, Police leh AFC ten December 1, Inrinni zanah second leg an khel ang. Final khelh hun hi December 7 ni mah se I League club-in final an luh chuan khelh hun sawn a ṭul ang.

Aizawl FC hi Real Kashmir (December 5), Churchill Brothers (December 9) leh Indian Arrows (December 14) te hmachhawn turin an zin chhuak dawn a, hei vang hian Gift Raikhan hote hian final an lut a nih chuan MPL final hi December thla chanve hnu lamah khelh a ṭul dawn.

MPL Qualifier
MPL8 khel tur zawnna chu November 27 leh December 1 chhung Lammualah zawhfel a ni dawn. Mizorama league sang ber khel tur zawnnaah district pariat ten team hnih ṭheuh an thawh thei a, tun ṭumah hian Aizawl DFA aiawhin Kanan FC leh Venghnuai ten inelna an hmachhawn dawn. Aizawl khaw pawn aṭangin New Serchhip an tel bawk ang.

Team pahnih hi vawi khat ṭheuh an inkhelh kual hnuah point hmu sang berin MPL an khel dawn a, pahnihnain MPL7-a pasarihna Ramhlun North nen playoff an khel leh dawn.

MPL Playoff
Ramhlun North leh MPL Qualifier-a pahnihna te hian double leg hmangin MPL khel tur an zawng dawn a, December 4 leh December 7-ah inelna hi neih tur a ni.

MPL7 league round khelh zawh takah khan Bethlehem Vengthlang FC chuan point hmu tlem berin an relegate a, team dang paruk Chhinga Veng, Aizawl FC, Mizoram Police, Chanmari FC, Electric Veng leh Chawnpui FC te erawh season tharah kan hmuh chhunzawm ang.

MPL7 SEMIFINAL
Venue: Lammual
First Leg
24 Nov Chhinga Veng 7:30 PM Chanmari FC
26 Nov Aizawl FC 7:30 PM Mizoram Police
Second Leg
29 Nov Chanmari FC 7:30 PM Chhinga Veng
1 Dec Mizoram Police 7:30 PM Aizawl FC
Final - December 7, Nilaini
(Aizawl FC-in final an lut a nih chuan ngaihtuah ṭhat tur a ni)

MPL QUALIFIER
Venue : RG Stadium
27 Nov Kanan FC 2:00 PM Venghnuai
29 Nov New Serchhip 2:00 PM Kanan FC
1 Dec Venghnuai 2:00 PM New Serchhip

MPL PLAYOFF
Venue : Lammual
First Leg
4 Dec Ramhlun North 1:30 PM Qualifier 2
Second Leg
7 Dec MPL Qualifier 2 1:30 PM Ramhlun North