A thiam zinga thiam ber Zverev
Alexander Zverev chuan world number 1 Novak Djokovic hnehin ATP Finals nomawi a chawi a, German tlangval tan tennis a khelh hun chhunga nomawi a chawi lian ber niin, season thar nghahlehtirtu a ni nghal bawk.
Pathianni zan O2 Arena, London-a inkhelah vawi nga champion tawh Djokovic hi champion tura rinkai a ni a, mahse 6-4, 6-3 in a chak lo zawkah a ṭang - Serbian thlangval hian number 1 ni chungin season khar dawn mah se hun tawp hman dan duhawm tak chu a ni lo ang.
Seeded pathumna Zverev hian set hmasa zawkah 5-4 a nih laiin Djokovic-a service a chhuhsak a, vawi thum ngawt aces siam zuiin set a la. Kum 21 mi hian set hnihna a thunun hneh a, harsa lutuk loin straight set-in a tlang thei a ni.
Thawhlehna
ATP Finals hi mipa tennis khel thiam zual pariat inel nana buatsaih a ni a, group pahnihah ṭhen niin an inkhelh kual hnuah a sang pahnih zelin semifinal an lut. Group match bikah Zverev hi Djokovic lakah a tlawm, inkhel pawimawh berah erawh huaisen taka ngamtu a ni.
World number 4 Zverev chuan, "Rin phak baka lawmna nasa a ni, ka tan chuan a hluin a ropui lutuk a, nomawi ka chawi tawh zinga a lian ber leh ropui ber a ni," a ti. Champion hian Rs 18,45,19,000 a dawn bakah, ranking point 1,500 a hmuh belh a ni.
Zverev hian championship point a hmuh hmasa panga a chhawr ṭangkai thei lo a, harsa taka ngaih tur chu
ṭha zeta backhand letin point hlu bik a hmu. Lawm avangin a biangah mittui a luang a, court-ah a bawk hial. Tawnhriat ngah leh upa zawk Djokovic chu a bulah kal hnaiin a lawmpui.
Kum 31 mi Djokovic chuan, "Group Stage kan khelh lai ai kha chuan i khel ṭha takzet e, kawng hrang hrangin hma i sawn hman hle a ni," tiin tun hnaia player beisei awm berte zinga mi chungchang a sawi.
Grand Slam?
Tennis huanga big four tia an sawi ṭhin - Roger Federer, Rafael Nadal, Djokovic leh Andy Murray ten an vanglai hun an hmang liam mek a, anni thlak thei tur player an rawn chhuak mek; chung zinga beisei awm bera chhal ngam chu Zverev hi a ni.
Mahse, inelna lian ber Grand Slam bikah beisei a phak lo ṭhin hle. Kumin French Open-ah khan quarterfinal a thleng a, a tawn san ber a ni. Australian Open, Wimbledon leh US Open-ah te chuan fourth round pawh a la pel lo.
Major title la rih lo mah se ATP Finals-ah player ṭha bik a nih zia a lantir a, Grand Slam vawi 20 champion tawh Federer a paltlang hnuah; tun hnai match 37 a khelh aṭanga vawi 35 chak thei Djokovic a ngam leh ta.
Player langsar dangte ang bawkin service a nei ṭha tawk a, final bikah hian a tlangpuia chhutin 140mph velin a vaw thei. ATP Masters title pathum la tawhtu hian thawhrimna nen huaisen taka hma lam a pan a nih chuan a rualpui zinga chungnung bik ni thei tur a ni ang.
Zverev hi Djokovic leh Federer hneh kawp chunga ATP Finals title la thei hmasa ber a ni a, Andre Agassi (1990) hnua seeded sang pahnih hneh chuanga champion thei hmasa ber a ni bawk. Tun dinhmunah Zverev hi kum 21 leh thla ruka upa chauh a la ni a, ATP Finals-ah hian Djokovic (2008) tih lohah chuan champion thei naupang ber a ni. German mipa tennis khel thiam zingah Boris Becker (1995) chu ATP Finals champion thei hnuhnung a ni a, kum 23 hmuah Zverev hian a hnung a rawn zui ve leh chiah.
Tun hnai ATP Finals
2017 Grigor Dimitrov beat David Goffin
2016 Andy Murray beat Novak Djokovic
2015 Novak Djokovic beat Roger Federer
2014 Novak Djokovic beat Roger Federer
2013 Novak Djokovic beat Rafael Nadal
2012 Novak Djokovic beat Roger Federer